ٹیکسلا (نوائے وقت رپورٹ) سابق وزیر داخلہ چودھری نثار کا کہنا ہے کہ بانیء پاکستان تحریک انصاف 54 سال سے میرے دوست ہیں وہ اس وقت مشکل میں ہیں کس طرح تنقید کروں۔ ٹیکسلا میں جلسے سے خطاب کرتے ہوئے چودھری نثار نے کہا کہ مخالفین پر تنقید پسند نہیں کارکردگی پر بات کرنا چاہتا ہوں، ان کا کہنا تھا کہ ن لیگ میرے ہاتھوں میں پیدا ہوئی اور پلی بڑھی، ن لیگ میں 35 سال گزارے، ان پر تنقید کرنا اچھا نہیں لگتا۔ چودھری نثار نے کہا کہ ن لیگ سے اپنی عزت نفس کی خاطر ناراض ہوا۔ بزرگوں کے سامنے تو ہاتھ باندھ کر کھڑا ہو سکتا ہوں مگر بچوں کے سامنے نہیں۔ سابق وزیر داخلہ نے کہاکہ مخالفین کو 8 فروری کو میرا ووٹر جواب دے گا۔ میرے مخالف نے پی آئی اے کا بھٹا بٹھایا۔ چودھری نثار کا کہنا تھا کہ کسی سیاسی جماعت کی دم پکڑ کر نہیں بلکہ عوام کی طاقت سے ایم این اے بنوں گا۔ پچھلی بار کی طرح آپ کے ووٹ پر ڈاکہ نہیں ڈالنے دوں گا۔