غیرجماعتی بنیادوں پر بلدیاتی انتخابات کے انعقاد کا بل حکومت کے گلے پڑ گیا

منگل کو سینٹ کے اجلاس میں دوبل منظور کر لئے گئے تاہم ابھی تک غیر جماعتی بنیادوں پر بلدیاتی انتخابات کرانے کے لئے قومی اسمبلی سے منظور کردہ بل سینٹ میں منظوری کیلئے ایجنڈا پر نہیں لا یا گیا تاہم اس بارے میں مجلس قائمہ برائے داخلہ کی رپورٹ ایوان میں پیش کر دی گئی، وفاقی حکومت قومی اسمبلی سے منظور کردہ بل کو موجودہ شکل میں منظور کرانے میں’’ ہوم ورک‘‘ مکمل نہیں کر سکی بلدیاتی انتخابات کا معاملہ وفاقی حکومت کے گلے پڑ گیا ہے۔ قائد ایوان راجہ محمد ظفر الحق متحرک کر دار ادا کر رہے ہیں وہ سینٹ میں حکومت کی بھر پور نمائندگی کر رہے ہیں انہوں نے منگل کو چیئرمین سینٹ میاں رضا ربانی کو یہ کہہ کر کہ وہ سینٹ سے اردو کا نفاذ شروع کریں امتحان میں ڈال دیا، راجہ محمد ظفر الحق نے ایک قوم پرست لیڈر کی حیثیت سے چیئرمین سینٹ جو ہر روز ارکان کو آئین کی بالا دستی کا درس دیتے ہیں کی آئین میں دی گئی 15سال کی دی ہوئی مدت ختم ہونے کی طرف توجہ مبذول کرائی اور کہا کہ کیوں نہ اس نیک کام کا آغاز سینٹ سے کیا جائے راجہ محمد ظفر الحق کو اس تجویز پر زبردست پذیرائی حاصل ہوئی ارکان نے ڈیسک بجا کر ان کی تجویز کا خیر مقدم کیا۔ ایوان میں فٹ بال اور ہاکی کے معاملات کی بازگشت سنی گئی وفاقی وزیر برائے بین الصوبائی رابطہ میاں ریاض حسین پیرزادہ نے کہا ہے کہ وفاقی حکومت کا فٹ بال فیڈریشن کے معاملات سے کوئی تعلق نہیں، ہم نے دو گروپوں کی لڑائی کے معاملے پر فیفا کو خطوط تحریر کئے ہیں، فٹ بال ایسوسی ایشن کے انتخابات کے حوالے سے عدالت کے فیصلے پر عمل کیا جائے گا۔ راجہ ظفر الحق نے ایوان کی توجہ اس جانب مبذول کرائی تھی کہ ہاکی ٹیم نے پوری قوم کو مایوس کیا ہے۔ میاں ریاض حسین پیرزادہ نے کہا ہے کہ ورلڈ ہاکی لیگ میں پاکستانی ٹیم کی ناقص کارکردگی سے پوری قوم کو شرمندگی ہوئی ہے، وزیراعظم نے اس کا سخت نوٹس لیا ہے آج ٹیم کے کپتان اور مینجمنٹ کو طلب کر لیا ہے ہمیں کھیلوں کی فیڈریشنز کے معاملات ٹھیک کرنا ہوں گے۔