کراچی(اسپورٹس رپورٹر) لیژر لیگ کے تحت رونالڈینیو اینڈ فرینڈز فیسٹیول میچ کی تیاریوں کو حتمی شکل دی گئی۔ یہ میچ ہفتہ کی شام ہاکی کلب آف پاکستان اسٹیڈیم کے آسٹروٹرف پر کھیلا جائے گا۔ 50 منٹ دورانیہ کا یہ میچ7 اے سائیڈ ہوگا جو رونالڈینیو الیون اور کیگز الیون کے درمیان کھیلا جائے گا۔ میچ میں شرکت کے لئے آنے والے 4 کھلاڑی رونالڈینیو الیون اور دیگر چار کھلاڑی لیگز کی نمائندگی کریں گے۔ جبکہ لیزر لیگ کے دوران منتخب کئے گئے 28 کھلاڑیوں کو بھی ان دونوں اسکواڈ کا حصہ بنایا گیا ہے۔ اس کے علاوہ پانچ انٹرنیشنل کھلاڑی بھی ایکشن میں آئیں گے ان میں عبد العزیز بلوچ‘ صدام حسین‘ عیسیٰ خان‘ کلیم اللہ اور سعداللہ شامل ہیں۔ دوسری جانب رونالڈینیو اور فرینڈز پروگرام کے کھلاڑی ہفتہ کو اسلام آباد پہنچے کے جہاں وہ آرمی کے سربراہ سے خصوصی ملاقات کریں گے۔ بعد ازاں دوپہر کو میچ کھیلنے کے سلسلے میں کراچی آئیں گے۔ کراچی شہر میں اس تاریخی میچ کے سلسلے میں جوش و جذبہ پایا جاتا ہے۔ ہاکی کلب اسٹیڈیم کو خوبصورتی سے سجایا گیا ہے جبکہ شائقین فٹبال بھاری قیمت کے باوجود ٹکٹ کے حصول میں کوشاں ہیں۔ دوسری جانب لیژر لیگ کے نمائندوں نے لیاری کے فٹبالرز کو ایک ہزار ٹکٹ تحفہ میں دیئے ہیں جوکراچی سائوتھ فٹبال ایسوسی ایشن کے مرکزی رہنما ناصرکریم اور ان کی ٹیم نے کراچی سائوتھ کے کلبوں میں یکساں طور پر تقسیم کئے۔