دورہ سری لنکا، قومی کرکٹرز کا تربیتی کیمپ ختم، آج شب کولمبو روانگی

 لاہور(سپورٹس رپورٹر)دورہ سری لنکا کیلئے پاکستان کرکٹ ٹیم کا 4 روزہ تربیتی کیمپ ختم ہوگیا۔ نیشنل سٹیڈیم کے حنیف محمد ریجنل اکیڈمی گراونڈ پر کیمپ کے آخری دن صرف صبح کے سیشن میں پریکٹس ہوئی، چند کھلاڑیوں کی جمعہ کی شام حارث رؤف کے ولیمہ میں شرکت کیلئے اسلام آباد روانگی متوقع تھی تاہم پی سی بی نے خراب موسمی حالات کے سبب کسی زحمت سے بچنے کیلئے کھلاڑیوں کو اسلام آباد جانے سے روک دیا۔بیشتر کھلاڑیوںکا کراچی ہی میں جمعہ کی شام شاہد آفریدی کی بڑی صاحبزادی کی تقریب رخصتی میں شرکت کا بتایاگیا،پاکستان کرکٹ ٹیم کی دورہ سری لنکا کیلئے ہفتہ کی شب دبئی کے راستے کولمبو روانگی ہوگی۔ویزہ نہ ملنے کے سبب پاکستان نہ آسکنے والے بائولنگ کوچ مورنے مورکل دبئی میں قومی ٹیم کو جوائن کریں گے۔قومی ٹیم 9 جولائی کو سری لنکا پہنچے گی جہاں وہ 11 اور 12جولائی کو2روزہ وارم اپ میچ کھیلے گی، سیریز کا پہلا ٹیسٹ میچ گال انٹرنیشنل سٹیڈیم میں 16 تا 20 جولائی ہوگا جبکہ دوسرا ٹیسٹ کولمبو میں 24 سے 28جولائی تک شیڈول ہے۔