مانسہرہ‘فورٹ منرو:2 گاڑیاں کھائی میں جاگریں‘4 افرادجاں بحق‘17 زخمی

مانسہرہ‘فورٹ منرو (نوائے وقت رپورٹ) مانسہرہ میں لولوسر جھیل کے قریب گاڑی کھائی میں جاگری۔ گاڑی میں لاہور کے ایک ہی خاندان کے 5افراد سوار تھے۔ حادثہ کے نتیجہ میں میاں بیوی جاں بحق جبکہ انکے 3بچے شدید زخمی ہوئے ہیں۔ جاں بحق افراد کی نعشیں اور زخمی بچوں کو ناران ہسپتال منتقل کردیا گیا ہے۔علاوہ ازیں فورٹ منرو میں سیاحوں کی وین گہری کھائی میں جاگری۔ حادثہ ڈیرہ غازی خان کے سیاحتی مقام فورٹ منرو سے واپسی گردو سٹیل پل پر پیش آیا۔ حادثے میں 2 افراد جاں بحق جبکہ 14 زخمی ہو گئے۔ سیاحوں کا تعلق ضلع مظفرگڑھ علی پور سے ہے، جاں بحق افراد کی لاشوں اور زخمیوں کو ہسپتال منتقل کر دیا گیا۔ اطلاعات کے مطابق زخمیوں کی حالت تشویشناک ہونے کی وجہ سے ہلاکتوں میں اضافے کا خدشہ ہے۔