کوئٹہ (نوائے وقت رپورٹ) ایران سے بجلی کی سپلائی کی بندش کے بعد بلوچستان کے مکران ڈویژن کے اضلاع کے گرڈ سٹیشنوں کو بجلی کی سپلائی معطل ہوگئی۔ کیسکو ترجمان کے مطابق ایران سے مکران کے اضلاع گوادر، کیچ اور پنجگور کے گرڈ سٹیشنوں کو بجلی کی سپلائی معطل ہوگئی ہے۔ مکران میں ٹرانسمیشن لائنوں کو بجلی کی سپلائی ایران میں بجلی کی طلب میں اضافے کے باعث معطل ہوئی ہے۔ متاثرہ گرڈ سٹیشنوں میں مند، تْمپ، تْربت، ہوشاب، پنجگور، جیوانی، گوادر ڈور گرڈ سٹیشن شامل ہیں۔ بجلی کی سپلائی سے گوادر ڈیپ سی پورٹ، نیو گوادر انٹرنیشنل ائیر پورٹ، پسنی اور اورما ڑہ گرڈ سٹیشن بھی متاثر ہوئے ہیں۔ کیسکو ترجمان کے مطابق بجلی بحالی کے سلسلے میں ایرانی حکام سے مسلسل رابطے میں ہیں۔ پنجگور اور تربت کو نیشنل گرڈ سے منسلک کرکے بجلی فراہم کی جا رہی ہے۔ توقع ہے کہ ایران سے بجلی جلد بحال ہونے سے صورتحال معمول پر آجائے گی۔