منڈی بہائوالدین (نامہ نگار) مسلم لیگ ن کے قائد میاں نواز شریف اور مریم نواز آج منڈی بہائوالدین میں قائد اعظم سٹیڈیم میں افطار ڈنر میں شرکت اور اس موقع پر کارکنوں سے خطاب بھی کریں گے۔ مسلم لیگ ن کی مقامی تنظیم کی جانب سے انتظامات کو حتمی شکل دی جارہی ہے۔ مسلم لیگی رہنما میاں آصف شبیر نے بتایا کہ سٹیڈیم میں دس ہزار کرسیاں لگائی جارہی ہیں۔ یہاں یہ امر قابل ذکر ہے کہ مقامی میڈیا کو ابھی تک کوریج پلان کے حوالہ سے آگاہ نہیں کیا گیا اور غیر واضح طور پر میڈیاکو مسلم لیگ ن کی مقامی قیادت کی جانب سے نوازشریف کے پروگرام سے دور رکھنے کی کوشش کی جارہی ہے۔ میاں نواز شریف اور مریم نواز کی منڈی بہائوالدین آمد کے موقع پر ٹریفک پولیس کی جانب سے ٹریفک پلان ترتیب دے دیا گیا۔ ترجمان کے مطابق اس موقع پر دن دو بجے سے رات آٹھ بجے تک چوک ست سرا سے کسی بھی قسم کی ہیوی ٹریفک کے شہر میں داخلے پر پابندی ہوگی۔ سرگودھا پھالیہ روڈ سے آنے والے شرکا کنونشن اپنی پارکنگ چیمہ چوک سے ہوتے ہوئے گندم گودام ، لاری اڈا ، میرج ہال نزد ریلوے گراؤنڈ سنگل لائن میں گاڑیاں کھڑی کریں گے۔ ملکوال سے آنے والی ٹریفک اور شرکا ویلکم پٹرول پمپ سے شوگر مل روڈ پر سنگل لائن تا دیوان چوک پارکنگ کرسکیں گے ۔کھاریاںروڈ سے آنے والی ٹریفک و شرکا سٹی سی این جی ریلوے گرائونڈ میں گاڑیاں کھڑی کریں گے۔ ٹوٹل پٹرول پمپ سے لے کر سنیما گرائونڈ تک کوئی گاڑی، موٹرسائیکل اور ریڑھی وغیرہ پارک نہیں کی جاسکے گی۔