لاہور(نمائندہ سپورٹس+سپورٹس رپورٹر) پاکستان رواں سال نومبر میں برطانیہ کی بلائنڈ کرکٹ ٹیم سے ٹی۔20 سیریز کے 6 میچوں کی میزبانی متحدہ عرب امارات میں کرے گا۔ پاکستان بلائنڈ کرکٹ کونسل کے چیئرمین سیّد سلطان شاہ نے کہا کہ سیریز کا انعقاد 10 تا 19 نومبر کو متحدہ عرب امارات میں ہو گا۔ انہوں نے کہا کہ برطانیہ کے خلاف ٹی۔20 سیریز کیلئے 20 کھلاڑیوں کا انتخاب 25 تا 30 جون تک ایبٹ آباد میں ہونے والے نیشنل بلائنڈ کرکٹ ٹورنامنٹ کے کھلاڑیوں سے کیا جائے گا۔ پی بی سی سی کے معاملات کے حوالہ سے انہوں نے کہا کہ افغانستان نے ملک میں بلائنڈ کرکٹ کے فروغ کیلئے پاکستان سے کھلاڑیوں کی تربیت کیلئے معاونت طلب کی ہے۔ ہم افغانستان کے 30 کھلاڑیوں کی تربیت کریں گے جو ہماری کلب ٹیموں کے ساتھ میچز کھیلیں گے۔ افغان بلائنڈ کرکٹ کھلاڑیوں کی تربیت بلامعاوضہ کی جائے گی۔