جھڈو میں امیدواروں کی فہرست جاری، انتخابی نشان الاٹ

جھڈو  (نامہ نگار) الیکشن کمیشن آفس جھڈو نے شہر کے گیارہ وارڈز سے بلدیاتی انتخابات میں حصہ لینے والے سیاسی اور آزاد امیدواروں کے ناموں کی حتمی فہرست جاری کرکے انہیں انتخابی نشانات الاٹ کردیئے, فہرستوں کے مطابق شہر کے گیارہ وارڈز میں سے 56 امیداوار حصہ لے رہے ہیں جس میں پیپلزپارٹی کے 11 امیدوار میدان میں ہیں جبکہ وارڈ نمبر 06 سے پیپلزپارٹی کے رئیس ممتاز کھوسہ پہلے ہی بلامقابلہ جنرل کونسلر منتخب ہوچکے ہیں, جبکہ دیگر دس وارڈز میں پیپلزپارٹی کے امیدواروں کا مقابلہ متحدہ قومی موومنٹ، تحریک لبیک پاکستان سمیت آزاد امیدواروں سے ہوگا، جیسے جیسے الیکشن کے دن قریب آتے جارہے ہیں اور شدید گرمی کے ساتھ شہر کا سیاسی درجہ حرارت بھی بڑھتا جارہا ہے جوڑ توڑ کی سیاست اور مختلف برادریوں کے درمیان مشاورت کا عمل جاری ہے لیکن تاحال زیادہ تر حلقوں میں پیپلزپارٹی کے امیدواروں کے مقابلے میں آزاد امیدواروں کی پوزیشن کچھ خاص مضبوط نظر نہیں آتی اگر شہر کے دس وارڈ میں ون ٹوون مقابلے کی صورتحال پیدا نہیں ہوتی تو پیپلزپارٹی آنے والے بلدیاتی انتخابات میں اکثریت سے کامیاب ہوجائے گی۔