لاہور‘ فیروز والہ (نامہ نگاران) پرانی انارکلی فصیح روڈ پر پولیس اور ڈاکوئوں کے درمیان مبینہ مقابلے میں 2 ڈاکو ہلاک  جبکہ 2 ڈاکو فرار ہونے میں کامیاب ہوگئے۔  تھانہ پرانی انارکلی کے علاقے سے 4 ڈاکو شہری سے گن پوائنٹ پر موٹر سائیکل چھین کر فرار ہوئے۔ شہری کی طرف سے ون فائیو کی کال پر پولیس ٹیم نے فصیح روڈ پر قبرستان کے قریب ڈاکوؤں کو رائونڈ آپ کیا۔ پولیس کو دیکھتے ہی ڈاکوؤں نے فائرنگ شروع کردی۔ پولیس کی جانب سے فائرنگ سے 2 ڈاکو ہلاک جبکہ 2 فرار ہوگئے۔ مرنے والے ڈاکوؤں کی شناخت عاشق اور شہزاد کے نام سے ہوئی۔ ملزم دوران واردات شہریوں سے بدفعلی اور زیادتی کرتے تھے۔علاوہ ازیں فیروزوالہ سے نامہ نگارکے مطابق تھانہ صدر کے علاقے میں مبینہ پولیس مقابلہ میں 1ڈاکوزخمی حالت میں اسلحہ سمیت گرفتارکرلیا گیا جبکہ اسکے3 ساتھی فرار ہوگئے۔ پولیس کے مطابق ڈاکو راہگیروں کیساتھ واردات میں مصروف تھے ،پکڑنے کی کوشش کی گئی تو ڈاکوؤں نے پولیس پراندھا دھند فائرنگ کر دی پولیس نے جوابی فائرنگ کے بعد جاکر دیکھا تو ایک ڈاکو حماد سکنہ وی آئی پی کالونی فیصل آباد روڈ شیخوپورہ زخمی پایا گیا جس کے قبضہ سے اسلحہ اور گولیاں برآمد ہوئی۔ ملزم کو ہسپتال منتقل کر دیا گیا ہے جبکہ فرار ملزم ساتھیوں کی تلاش جاری ہے۔