لاہور (خصوصی نامہ نگار) سکھ مذہب کے پانچویں گورو ارجن دیو جی کی برسی پر تقریبات میں شرکت کے لیے بھارت سے سکھ یاتری واہگہ بارڈر کے راستے آ ج 8 جون ہفتہ کو پاکستان پہنچیں گے۔ جہاں پاکستان سکھ گورودواہ پر بندھک کمیٹی کے ممبران اور ٹرسٹ بورڈ کے اعلیٰ افسران ان کا استقبال کریں گے۔ مرکزی تقریب 16جون کو گورو دوارہ ڈیرہ صاحب لاہور میں ہو گی۔ متروکہ وقف املاک بورڈ کی جانب سے بھارت سمیت دنیا بھر سے آنے والے سکھ مہمانوں کی رہائش، سکیورٹی اور سفری سہولیات سمیت دیگر تما م ضروری انتظامات مکمل کر لیے گئے۔ یاتری 8جون کو لاہور سے گورو دوارہ پنجہ صاحب حسن ابدال روانہ ہوں گے ایک دن قیام کے بعد10جون کو حسن ابدال سے ننکانہ جائیں گے جہاں پر گورو دوارہ جنم استھان میں قیام کے دوران 11جون کو گوردوارہ سچا سودا فاروق آباد جائیں گے اور واپس جنم استھان ننکانہ میں قیام کریں گے۔ یاتری 12جون کو ننکانہ سے گورو دوارہ کرتار پور نارووال جائیں گے جہاں ایک دن قیام کے بعد 14جون کوگوردوارہ روہڑی صاحب ایمن آباد کی یاترا کرتے ہوئے لاہور آئیں گے۔ گورو ارجن دیو جی کی برسی کی مرکزی تقریب 16جون کو گورو دوراہ ڈیرہ صاحب لاہور میں ہو گی۔ بھارتی سکھ یاتری دورہ مکمل کرنے کے بعد 17جون کوبھارت روانہ ہو جائیں گے۔