چیئرمین پرائم منسٹرز یوتھ پروگرام نے فہد شفیق کو سندھ کیلئے کوآرڈینیٹر مقرر کر دیا

اسلام آباد(خبرنگار)چئیرمین پرائم منسٹرز یوتھ پروگرام رانا مشہود احمد خا ں نے فہد شفیق کو صوبہ سندھ کے لیے کوآرڈینیٹر مقرر کر دیا۔جمعہ کو وزیراعظم یوتھ پروگرام سے جاری کردہ بیان کے مطابق یہ تقرری پرائم منسٹر یوتھ پروگرام کے چیئرمین رانا مشہود احمد خاں نے صوبہ سندھ میں نوجوانوں کی ترقی کے اقدامات کو مزید بڑھانے کے وڑن کے ساتھ کی ہے۔چیئرمین رانا مشہود احمد خاں نے فہدشفیق کی صلاحیتوں پر اعتماد کا اظہار کرتے ہوئے کہاکہ انہیں فہد شفیق کو اپنی ٹیم میں خوش آمدید کہتے ہوئے خوشی ہو رہی ہے۔ نوجوانوں کو بااختیار بنانے کے لیے ان کی لگن اور سندھ میں نوجوانوں کو درپیش منفرد چیلنجز کے بارے میں ان کی سوچ نے انہیں ایک انمول بنا دیا ہے۔ ہمارے پروگرام کے علاوہ ہم سندھ کے نوجوانوں کو مثبت تبدیلی لانے اور نئے مواقع فراہم کرنے میں ان کے تعاون کے منتظر ہیں۔"فہد شفیق نے اس موقع پر اظہار تشکر کرتے ہوئے کہاکہ مجھے سندھ کے لیے کوآرڈینیٹر مقرر ہونے پر فخر ہے۔ میں سندھ کے نوجوانوں کے روشن مستقبل اوران کی کامیابی کے لیے درکار وسائل اور مدد فراہم کرنے کے لیے تندہی سے کام کرنے کے لیے پرعزم ہوں۔