لاہور (نمائندہ سپورٹس )پاکستان سپر لیگ کے میچ میںکوئٹہ گلیڈی ایٹرز نے ملتان سلطانز کو دو وکٹوں سے شکست دیدی ۔کوئٹہ گلیڈی ایٹرز نے ٹاس جیت کر فیلڈنگ کا فیصلہ کیا ۔ملتان سلطانز نے 5وکٹوں پر152 رنز بنائے۔ملتان سلطانز کی اننگز کی کا آغاز کچھ اچھا نہ تھا اور اننگز کی پہلی ہی گیند پر کمار سنگاکارا پویلین لوٹ گئے جبکہ احمد شہزاد بھی صرف ایک رن بنانے کے بعد انور علی کو وکٹ دے بیٹھے۔تین رنز پر دو وکٹیں گرنے کے بعد صہیب مقصود کا ساتھ نبھانے سہیل تنویر آئے اور دونوں نے 38 رنز کی شراکت قائم کر کے ٹیم کو بہتر پوزیشن میں پہنچا دیا، سہیل تنویر 19 رنز بنا کر آؤٹ ہوئے۔صہیب مقصود نے کپتان شعیب ملک کیساتھ مل کر سکور 81 تک پہنچایا لیکن بین لافلن کیخلاف وکٹوں کے سامنے پیڈ لانے کی پاداش میں وہ آؤٹ قرار دیے گئے جبکہ روز وائٹلی نے 16 رنز بنائے۔کپتان شعیب ملک نے 43 گیندوں پر تین چھکوں اور چار چوکوں کی مدد سے 65 رنز بنا کر اپنی ٹیم کو معقول مجموعے تک رسائی دلائی۔ملتان سلطانز نے پانچ وکٹوں پر 152 رنز بنائے۔محمد نواز ‘انور علی ‘راحت علی ‘لافلین اور شین واٹسن نے ایک ایک وکٹ حاصل کی ۔کوئٹہ گلیڈی ایٹرز نے ہدف 8وکٹوں کے نقصان پرپورا کرلیا۔ اسد شفیق بیس ‘شین واٹسن چھبیس ‘کیون پیٹرسن پانچ ‘ریلی روسو ستائیس‘رمیز راجہ جونیئر بائیس ‘سرفراز احمد گیارہ ‘انور علی پندرہ ‘محمد نواز گیارہ رنز بناکر آئوٹ ہوئے ۔ حسن خان نو اور لافلین تین رنز پر ناٹ آئوٹ رہے ۔ عمر گل نے 6کھلاڑیوں کو آئوٹ کیا ۔ کوئٹہ گلیڈی ایڈیٹرز کی ٹیم میں تین تبدیلیاں کی گئی ہیں اور محمود اللہ، جان ہیسٹنگز اور عمرامین کو ملتان سلطانز کے خلاف میچ کے لیے ٹیم میں شامل نہیں کیا گیا۔ ملتان سلطانز کی ٹیم میں بھی 2 تبدیلیاں کی گئی ہیں جس میں ڈیرن براوو اور جنیدخان کی جگہ روز وائیٹلی اورعمرگل کو شامل کیا گیا ہے۔