شکرگڑھ ( نامہ نگار) وزیر اعظم عمران خان کی شہرت بھارت پہنچ گئی۔ بھارتی تنظیم دل خالصہ نے نانک شاہی کیلنڈر پر عمران خان کی تصویر چھاپ دی۔ تصویر کا چھپنا سکھ مسلم بھائی چارے کا اعتراف ہے۔سکھ رہنمابھارتی پنجاب کی سکھ تنظیم دل خالصہ نے نانک شاہی کیلنڈر پر وزیر اعظم عمران خان اور کرتار پور راہداری کے افتتا ح کی تصاویر چھاپی ہیں۔ سکھ رہنماؤں نے اسے خوش آئند اور سکھ مسلم بھائی چارے کی علامت قرار دیا ہے۔ پارلیمانی سیکرٹری پنجاب برائے اقلیتی امور و انسانی حقوق سردارمہندر پال سنگھ نے کہا ہے کہ بھارتی پنجاب کے دل خالصہ نے نئے سال کے کیلنڈر پر عمران خان اور دربار صاحب کرتارپور میں نصب کرپان صاحب کی تصویر لگا کر جہاں پاکستانی بھائیوں کے دل جیت لئے ہیں وہیں پر انہوں نے مسلم سکھ بھائی چارے اور باہمی محبت کا اعتراف کیا ہے، انہوں نے دل خالصہ کا شکریہ بھی ادا کیا کہ دل خالصہ نے نانک شاہی کیلنڈر میں وزیراعظم پاکستان عمران خان کی کرتارپور راہداری کے افتتاح کی تصویر لگائی۔ جو محبت بھائی چارے کا منہ بولتا ثبوت ہے، سردار مہندر پال نے اپنے بیان میں کہا کہ جو محبت بیجتا ہے وہی محبت کاٹتا ہے۔ عمران خان نے راہداری کھول کر محبت بانٹنے میں پہلا قدم بڑھایا آج پوری دنیا کے سکھ عمران خان اور پاکستان کے گن گا رہے ہیں، میں اپنے ہمسائے ملک کو دعوت دیتا ہوں کہ وہ نفرتیں چھوڑ کر محبت بانٹیں اپنے ملک میں اقلیتوں کو حقوق دیں۔ آج پاکستان میں اقلیتوں کو آزادی حاصل ہے اور مزید بہتری کے لئے عمران خان کی قیادت میں کوششیں جاری ہیں۔ پاک فوج نے قربانیاں دے کر اس ملک سے دہشتگردی ختم کی ان قربانیوں کے نذرانوں سے ملک میں امن آیا اب پاکستان ہر پاکستانی کو برابری کے حقوق دے گا تاکہ پاکستان ترقی کرے۔