خواتین خاندانوں ، معاشروں میں ریڑھ کی ہڈی کی حیثیت رکھتی ہیں:سید فرہاد علی

لاہور(خبرنگار)پراسیکیوٹر جنرل پنجاب سید فرہاد علی شاہ نے وزیراعلیٰ پنجا ب مریم نواز کے وژن کے مطابق خواتین کی خدمات کا اعتراف کرتے ہوئے 8 مارچ بروز جمعہ خواتین کا دن منانے کا اعلان کیاہے۔ اس موقع پر پراسیکیوٹر جنرل پنجاب سید فرہاد علی شاہ کا کہنا تھا کہ خواتین خاندانوں اور معاشروں میں ریڑھ کی ہڈی کی حیثیت رکھتی ہیں۔ وہ اپنے خاندانوں کو دیکھ بھال، مدد اور پرورش فراہم کرتے ہیں اور بچوں کی نشوونما کیلئے ضروری ہیں۔ خواتین کمیونٹی کی تعمیر میں بھی اہم کردار ادا کرتی ہیں اور اکثر کمیونٹی تنظیموں میں قائدانہ کردار ادا کرتی ہیں۔ اقوام متحدہ 8 مارچ کو یوم خواتین کے طور پر مناتی ہے۔ خوش قسمتی سے ہمارے نو منتخب وزیر اعلیٰ پنجاب کا اپنے پہلے دن سے ہی خواتین کے وقار کو برقرار رکھنے کا واضح وژن ہے۔ خواتین کے عالمی دن کی صنفی مساوات اور خواتین کے حقوق کیلئے بہت اہمیت ہے۔ یہ دن سماجی، اقتصادی، ثقافتی اور سیاسی کامیابیوں سمیت تمام شعبوں میں خواتین کے حقوق کے بارے میں شعور اجاگر کرنے کا ایک پلیٹ فارم فراہم کرتا ہے۔