بابر اعظم کی ون ڈے کیرئیر کی سنچری مکمل ، یاد گاری شرٹ پیش 

لاہور(سپورٹس رپورٹر)نیوزی لینڈ کےخلاف سیریز کے پانچویں ون ڈے میچ میں پاکستان کرکٹ ٹیم کے کپتان بابراعظم 100 واں ون ڈے کھیلنے والے کھلاڑی بن گئے، اَن گنت ریکارڈز کے حامل بابر کو یہ سنگ میل حاصل کرنے کیلئے 8 سال کا وقت لگا۔پاکستان کرکٹ بورڈ نے انکی خدمات کے اطراف میں بابراعظم کو میچ سے قبل 100 میچز مکمل ہونے پر انہیں یادگاری ٹی شرٹ بھی دی۔ون ڈے انٹرنیشنل میں بابراعظم کی اوسط 59.85 ہے، 47 ٹیسٹ میں ان کی اوسط 48.63 جبکہ 104 ٹی20 میچز میں اوسط 41.48 ہے، مجموعی طور پر بابراعظم 30 انٹرنیشنل سنچریز سکور کرچکے ہیں۔ ان میں 18 ون ڈے انٹرنیشنل ،9 ٹیسٹ اور 3 ٹی ٹونٹی کی سنچریز شامل ہیں۔بابر اعظم کو کرکٹ کیریئر کے دوران ان گنت ریکارڈز اپنے نام کرنے کےساتھ ان پہاڑوں جیسے رنز کے ذریعے حریف ٹیم کو چاروں چانے شانے چت کردینے کا اعزاز حاصل ہے۔ پاکستان کو ون ڈے کی نمبر ون ٹیم بنانے والے کپتان کا سہرا بھی حال ہی میں بابر اعظم کے سر سجا ہے۔ بابر اعظم اپنے پہلے 25 ون ڈے میچز میں کسی بھی بیٹر سے زیادہ (1306 ) رنز بنانے اور کم سے کم 97 اننگز میں 5 ہزار رنز بنانے والے کرکٹر کا اعزاز رکھتے ہیں۔ون ڈے میچز کی تاریخ میں بابر اعظم وہ واحد بیٹر ہیں جن کی ون ڈے ایوریج 59.85 رہی، ون ڈے میچز میں اب تک یہ اعزاز صرف بابر اعظم کے پاس ہے۔بطور کپتان 20 ون ڈے میچز میں بابر اعظم کی ایوریج کسی بھی کپتان کے مقابلے سب سے زیادہ75.17 رہی۔بابر کی 18 ون ڈے سنچریز کے میچز میں سے 14 میں پاکستان کو فتح ملی،3 میں شکست جبکہ ایک میچ ٹائی ہوا۔کپتان بابر اعظم وہ واحد بیٹر ہیں جو دو مرتبہ تین لگاتار ون ڈے سنچریز بناچکے ہیں۔بابر اعظم 757 دن تک ون ڈے بیٹرز رینکنگ میں نمبر ون رہے ہیں۔2019 کے ون ڈے ورلڈکپ کے دوران بابر اعظم نے بطور پاکستانی بیٹر 474 رنز بنائے اس سے قبل کسی ایک ورلڈکپ میں اتنے رنز بنانے کا اعزاز کسی پاکستانی بیٹر کو حاصل نہیں رہا۔بابر اعظم آئی سی سی چیمپئن ٹرافی کی فاتح ٹیم میں شامل تھے۔بابر وہ واحد پاکستانی بیٹر ہیں جنہیں آئی سی سی مینز اوڈی آئی کرکٹر آف دی ایئر کے اعزاز سے نوازا گیا۔2022 میں بابر اعظم نے سرگار فیلڈ سوبرز کرکٹر آف دی ایئر 2022 بھی اپنے نام کیا تھا۔2020 میں بابر اعظم نے پاکستان کے ویلیوایبل کرکٹ آف دی ایئر کا ایوارڈ حاصل کیا۔ون ڈے میچز کی سنچری مکمل کرنے پر پاکستان ٹیم کے کھلاڑیوں کی جانب سے بابر اعظم کو خصوصی تحفہ دیا گیا۔قومی کرکٹ ٹیم کے بیٹر محمد رضوان اور فاسٹ باﺅلر شاہین آفریدی نے بابر اعظم کو 100 نمبر کی خصوصی جرسی پیش کی۔