لاہور (کلچرل رپورٹر) ہدایت کار حسن عسکری کی فلم ”داستان“ کا یونٹ قلعہ روہتاس پہنچ گیا ہے۔ آج فلم کی ہیروئن زری اور ان کے ساتھی فنکاروں کے سین عکسبند کئے جائیں گے۔ زری نے کہا کہ ہدایت کار حسن عسکری کے ساتھ میری یہ پہلی فلم ہے۔ ان کا شمار بڑے ڈائریکٹرز میں ہوتا ہے اور میری یہ خوش قسمتی ہے کہ ان کے ساتھ کام کرنے کا موقع ملا ہے۔ انہوں نے کہا کہ میں فلم میں ہیروئن کا کردار ادا کر رہی ہوں۔ فلم کا سکرپٹ بہت مضبوط ہے۔ امید ہے کہ یہ فلم لوگوں کو پسند آئے گی اور فلم انڈسٹری کا بحران کم کرنے میں اہم کردار ادا کرے گی۔ انہوں نے کہا کہ اس وقت فلم انڈسٹری کو اچھی فلموں کی ضرورت ہے۔