ٹاپ آرڈر ناکام‘ نیوزی لینڈ نے پاکستان کو مسلسل بارہواں ون ڈے میچ ہرا دیا

لاہور (سپورٹس رپورٹر+نمائندہ سپورٹس)نیوزی لینڈ نے پاکستان کو پہلے ایک روزہ میچ میں 47 رنز سے شکست دے کر 3 میچوں کی سیریز میں1-0 سے برتری حاصل کرلی ہے۔نیوزی لینڈ نے پاکستان کو 267 رنز کا ہدف دیا،گرین شرٹس 47 اعشاریہ 2 اوورز میں 219 پر ڈھیر ہوگئی، نمایاں بیٹسمینوں میں کپتان سرفراز احمد 64، عماد وسیم 50، امام الحق 34 اور شعیب ملک کے 30 رنز شامل ہیں۔ابوظہبی کے شیخ زید کرکٹ سٹیڈیم میں کھیلے گئے میچ میں نیوزی لینڈ نے پہلے بیٹنگ کی اور مقررہ 50 اوورز میں روس ٹیلر کے 80 اور ٹام لیتھم کے 68 رنز کی بدولت 9 وکٹ پر 266رنز بنائے۔گرین شرٹس کی طرف سے شاداب خان ،شاہین شاہ آفریدی نے 4،4 اور عماد وسیم نے روس ٹیلر کی بڑی وکٹ اپنے نام کی۔ہدف کے تعاقب میں گرین شرٹس کی طرف سے امام الحق اور فخرزمان نے اننگز اوپن کی،تاہم 8 کے سکور پر ٹرینٹ بولٹ کی تین گیندوں پر فخر زمان، بابر اعظم اور محمد حفیظ پویلین لوٹ گئے اور ٹی 20سیریز میں کلین سوئپ فتح سے ہمکنار رہنے والی ٹیم مشکلات کا شکار ہوگئی۔ایک ساتھ 3 وکٹ گر جانے کے بعد اوپنر امام الحق نے سینئر بیٹسمین شعیب ملک کے ساتھ مل کر انتہائی محتاط انداز میں بیٹنگ کی اور سکور 71 رنز تک پہنچایا، تاہم بائونڈری لگانے کی کوشش میں پاکستانی اوپنر 34 رنز پر کیچ آئوٹ ہوگئے،ان کی وکٹ فرگوسن کے حصے میں آئی۔فرگوسن کے اسی اوور میں شعیب ملک نے بھی امام الحق کی غلطی دہرائی اور بائونڈری لگانے کی کوشش میں 30 کے انفرادی سکور پر کیچ آوٹ ہوگئے، مزید کھلاڑی آئوٹ ہونے کے بعد گرین شرٹس پر دبائو بڑھ گیا۔پاکستان کی چھٹی ویں وکٹ 85 کے مجموعی سکور پر شاداب خان کی گری جو صرف7 رنز بنا سکے،انہیں ساوتھی نے میدان سے واپسی کا راستہ دکھایا۔ساتویں وکٹ پر کپتان سرفراز احمد نے عماد وسیم کے ساتھ مل کر سکور میں 103 رنز کا اضافہ کیا،سرفراز احمد نے اس دوران اپنی نصف سنچری مکمل کی،وہ 69 گیندوں پر 7 چوکوں کی مدد سے 64 رنز بناکر گرینڈ ہوم کا شکار بن گئے،یوں پاکستان نے 188 کے سکور پر اہم وکٹ کھودی۔آٹھویں وکٹ پر عماد وسیم اور حسن علی نے سکور میں 31 رنز کا اضافہ کیا، اس بار ٹم ساوتھی نے عماد وسیم کو نصف سنچری میکر کو آئوٹ کردیا،وہ 2 چھکوں کی مدد سے 50 رنز بناکر آئوٹ ہوئے۔حسن علی سولہ رنز بناکر فرگوسن کی گیند پر بولٹ کو کیچ تھما بیٹھے ۔ آخری وکٹ شاہین آفریدی کی گری جو بغیر کوئی رن بنائے فرگوسن کی گیند پر بولڈ ہوگئے ۔جنید خان صفر پر ناٹ آئوٹ رہے ۔ ٹرینٹ بولڈ نے فرگوسن نے تین تین ‘گرینڈ ہوم نے دو ‘ٹم سائوتھی اور ایش سوڈھی نے ایک ایک کھلاڑی کو آئوٹ کیا ۔ ٹرینٹ بولٹ کو میچ کا بہترین کھلاری قرار دیا گیا ۔ نیوزی لینڈ کی پاکستان کے خلاف ون ڈے میچز میں یہ مسلسل بارہویں کامیابی ہے۔ نیوزی لینڈ پاکستان کے خلاف گزشتہ 11 ایک روزہ میچز اور 4 سیریز سے ناقابلِ شکست ہے، گرین شرٹس نے کیوی ٹیم کے خلاف اپنا آخری میچ 4 سال قبل 14 دسمبر 2014 کو شارجہ کے مقام پر جیتا تھا۔دونوں ٹیموں کے درمیان دوسرا ون ڈے کل کھیلاجائے گا۔ میچ پاکستانی وقت کے مطابق سہ چار بجے ابو ظہبی میں شروع ہوگا۔