قصور (نمائندہ نوائے وقت) فیروز پور روڈ بھلو کے قریب نا معلوم نوجوان نے خود پر پٹرول چھڑک کر  آگ لگا لی۔ جھلس کر جاں بحق ہو گیا۔ ابتدائی رپورٹ کے مطابق نا معلوم نوجوان نے پمپ سے ایک لیٹر پٹرول خریدا اور تھوڑی دور جا کر خود پر چھڑک لیا اور ماچس سے خود کو آگ لگا لی۔ آگ نے اس نوجوان کو اپنی لپیٹ میں لے لیا اور وہ موقع پر ہی پوری طرح جھلس گیا جس کی وجہ سے اسکی موت واقع ہوگئی۔ واقعہ کی اطلاع پر پولیس تھانہ صدر اور مصطفی آباد موقع پر پہنچ گئی اور جائے وقوعہ کا جائزہ لیا اور لاش کو قبضہ میں لیکر پوسٹ مارٹم کے لئے ڈسٹرکٹ ہسپتال میں منتقل کر دیا۔ پولیس کے مطابق جاں بحق ہونے والا کوئی ملنگ ٹائپ نوجوان ہے جبکہ اسکے ورثاء کی تلاش جاری ہے۔