لاہور (حافظ محمد عمران/سپورٹس رپورٹر) بابر اعظم کی ذمہ دارانہ اور شعیب ملک کی جارحانہ بیٹنگ کی بدولت پاکستان نے سکاٹ لینڈ کو شکست دی۔ پاکستان کو ابتدائی اوورز میں رنز بنانے میں مشکلات کا سامنا تھا۔ آزادانہ رنز نہیں بن رہے تھے لیکن بابر اعظم اور محمد رضوان اپنے روایتی انداز میں کھیلتے رہے۔ پاکستانی بیٹنگ کے وقت گیند تھوڑا نیچ بھی رہ رہا تھا اور سلو بھی آ رہا تھا۔ شاٹس کھیلنا ذرا مشکل تھا ایسے حالات میں فخر زمان کے لیے رنز کرنا بھی مشکل تھا۔ وہ بھی مڈ وکٹ پر ایک اونچا شاٹ کھیلنے کی کوشش میں آؤٹ ہوئے۔ کپتان بابر اعظم نے ایک مرتبہ پھر نصف سنچری سکور کی یہ پہلا موقع تھا جب بابر بہت زیادہ کنٹرول کے ساتھ نہیں کھیل پائے ۔محمد حفیظ کی فارم میں واپسی ہوئی انہوں نے مختصر اننگز میں دلکش شاٹس کھیلے۔ شعیب ملک نے ناتجربہ کار اور کمزور باؤلنگ کا بھرپور انداز میں فائدہ اٹھایا اور ایک مرتبہ پھر ضرورت کے مطابق بیٹنگ کرتے ہوئے پاکستان کے سکور 189 رنز یک پہنچایا۔ انہوں نے اپنی پسندیدہ جگہ پر شاٹس کھیلے۔سکاٹ لینڈ کی ٹیم ہدف کے تعاقب میں پر اعتماد نہیں تھی۔ رچی بیرنگٹن کی نصف سنچری کے علاوہ کوئی بھی بلے باز مزاحمت نہ کر سکا۔ گرین شرٹس ٹرافی جیتنے سے صرف دو میچوں کی دوری پر ہیں۔