لاہور(سپورٹس رپورٹر)قومی ٹیم کے مینٹور میتھیو ہیڈن نے بنگلہ دیش سے فتح کے بعد شاہینوں کی حوصلہ افزائی کیلئے متاثر کن الفاظ کا استعمال کیا،میتھیو ہیڈن نے شاہینوں کو مخاطب کرتے ہوئے کہا کہ لڑکوں!ہم خطرناک ہوچکے ہیں، صرف اس چیز کو سمجھنے اور حوصلہ افزائی کرنے کی ضرورت ہے۔ پاکستان ٹیم جب بھی ارادوں کیساتھ میدان میں اترتی ہے مخالف کیلئے خطرہ بن جاتی ہے دنیا سمیت اس وقت اس ٹورنامنٹ میں کوئی بھی ایسی ٹیم نہیں ہے جو ہمیں فیس کرنا چاہتی ہو،قومی ٹیم کی حوصلہ افزائی کرتے ہوئے ہیڈن نے کہا کہ سمجھا جارہا تھاسب  نے ہم سے جان چھڑالی ہے لیکن وہ سب ہم سے جان نہیں چھڑاسکے، ہم اب بھی ٹورنامنٹ میں موجود ہیں اور مجھے خوشی ہے کہ گزشتہ ورلڈکپ کے مقابلے ٹیم کی صورتحال مختلف ہے کیونکہ گزشتہ ورلڈکپ میں ہم سے توقعات بہت زیادہ تھیں اس بار ہم یہاں سب کو پیچھے چھوڑتے ہوئے پہنچے ہیں، اگر نیدرلینڈز یہ میچ نہ جیتتا تو آج ہم یہاں نہ ہوتے لیکن ہم یہاں ہیں جس کا مطلب ہے کہ کوئی ہمیں یہاں نہیں دیکھنا چاہتا تھا اور یہ چیز ہمیں فائدہ دے سکتی ہے۔