موٹروے پولیس نے تبلیغی اجتماع کے شرکاءکیلئے ہدایت نامہ جاری کر دیا

اسلام آباد( نمائندہ نوائے وقت ) موٹروے پولیس نے تبلیغی اجتماع کے شرکاءکے لیے ہدایات جاری کر دی۔نیشنل ہا ئی ویز موٹروے کے مطابق ڈی آئی جی موٹروے نارتھ زون محمد یوسف ملک کی ہدایت پر موٹروے پولیس کی جانب سے تبلیغی اجتماع کے شرکاء اور ڈرائیور حضرات کے لیے ہدایت جاری کرتے ہوئے کہنا تھا کہ دوران سفر حادثات کی روک تھام اور ٹریفک کے بہاو¿ کو یقینی بنانے کے لیے چند ہدایات پر عمل کریں۔ چھت پر سواریاں ہرگز نہ بٹھائیں ورنہ قانونی کاروائی عمل میں لائی جا سکتی ہے اور گاڑی کو موٹروے سے نیچے اتارا جا سکتا ہے۔ بڑی گاڑیاں سڑک کے انتہائی بائیں جانب سفر کریں ، تیز رفتاری سے پرہیز کریں اور بار بار اوور ٹیکنگ سے گریز کریں، اوور لوڈنگ سے اجتناب کریں، سروس ایریاز میں موجود ہوٹل پیٹرول پمپ اور مساجد کے علاوہ موٹروے پر کہیں کھڑے نہ ہوں، شرکائے اجتماع بستر سامان وغیرہ باندھ کر رکھیں، سفر کے آغاز سے پہلے اپنی گاڑی کا فیول، ایئر پریشر ،اضافی ٹائر اور ٹائر تبدیلی کے اوزار، لائٹس وغیرہ کی مکمل تسلی کر لیں۔ ڈیوٹی پر مامور افسران کی ہدایات پر عمل کریں، کسی بھی ایمرجنسی کی صورت میں نیشنل ہائی ویز اینڈ موٹروے پولیس ہیلپ لائن 130 پر رابطہ کیا جا سکتا ہے۔