کسی لیڈر کا عوام میں مقبول ہونا سیاست کے میدان میں کوئی نئی چیز نہیں۔ تاریخ ہمیں بتاتی ہے کہ ایسے لیڈر کا عروج تقریباً ہمیشہ ہی اس کے زوال کے ساتھ جڑا ہوتا ہے۔ عوامیت پسندی، ایک سیاسی نظریہ جو عام لوگوں کے مفادات کی نمائندگی کرنے کا دعویٰ کرتا ہے، بیسویں اور اکیسویں صدی میں ایک قابل ذکر عروج دیکھ رہی ہے۔ ایسی تحریکوں کی قیادت اکثر کرشماتی رہنما کرتے ہیں جو قائم شدہ نظام کو تبدیل کرنے اور عوام کے حامی بن کر ”اشرافیہ“ کے خلاف کھڑے ہونے کا عزم رکھتے ہیں۔ عوامی تحریکوں نے دنیا بھر میں قابل ذکر مقبولیت حاصل کی ہے۔ ہم ایسے رہنماﺅں کو آج کے دور میں بھی دیکھتے ہیں، جو یورپ، امریکہ، اور جنوبی ایشیا کے مختلف ممالک میں موجود ہیں۔
خود کو ”عوام“ کی آواز بنا کر اور بے حس یا بدعنوان اشرافیہ کے خلاف کھڑا کر کے، عوامی رہنما تیزی سے وسیع پیمانے پر حمایت حاصل کر لیتے ہیں۔ تاہم، وہی خصوصیات جو انہیں اقتدار کی بلندیوں تک پہنچاتی ہیں۔ جوشیلے خطابات، متنازعہ پالیسیاں، اور قائم شدہ قواعد و ضوابط کو نظر انداز کرنااکثر ان کے زوال کا سبب بنتی ہیں۔
ایسے رہنماﺅں کی طرف سے اپنائی جانے والی ایک کلیدی حکمت عملی ”ہم بمقابلہ وہ“ کا بیانیہ تشکیل دینا ہے۔وہ اپنی جوشیلی تقاریر اور بلند و بانگ وعدوں کے ذریعے اپنے آپ کو عوام کے محافظ کے طور پر پیش کرتے ہیں، جبکہ اشرافیہ کو خودغرض، بدعنوان، یا حقیقت سے دور قرار دیتے ہیں۔ یہ بیانیہ ان لوگوں کے لیے بہت دلکش ہوتا ہے جو موجودہ حکومتی طاقتوں کی وجہ سے خود کو مظلوم یا نظرانداز شدہ سمجھتے ہیں۔ ایسے رہنما یہ وعدہ کرتے ہیں کہ وہ طاقت کے اس ڈھانچے کو منہدم کر دیں گے جو بظاہر عام لوگوں کو بے اختیار بنا چکا ہے۔ 
اقتدار حاصل کرنے کے بعد، عوامی رہنما تیزی سے طاقت کو مضبوط کرنے کے اقدامات کرتے ہیں، تاکہ وہ اپنے اثر و رسوخ کو مضبوط کر سکیں اور اپوزیشن سے بچ سکیں۔ وہ عموماً عدالت، میڈیا، اور سول سروس جیسے اداروں کو کمزور کرنے کی کوشش کرتے ہیں۔ آزاد میڈیا کو، جو ان کی حکومت پر تنقید کر سکتا ہے، اکثر متعصب یا جعلی خبروں کے طور پر مسترد کر دیا جاتا ہے۔ جو عدالتی پالیسییاں ان کی مخالفت کرتی ہیں، ان کی دوبارہ تشکیل ہوتی ہے یا ان میں وفادار افراد کو بھرتی کیا جاتا ہے۔ عوامی خدمت کے عہدے وفادار افراد کو دیے جاتے ہیں، جس سے اہلیت پر وفاداری کو فوقیت دی جاتی ہے۔ اس سے ایک ایسی ثقافت پروان چڑھتی ہے جہاں وفاداری کو اہلیت پر ترجیح دی جاتی ہے۔
سوشل میڈیا اور ریاستی کنٹرول میں موجود ذرائع ابلاغ طاقتور ہتھیار بن جاتے ہیں، جہاں اختلافی آوازوں کو خاموش کر دیا جاتا ہے۔ جب طاقت ایک مقام پر مرکوز ہوتی ہے تو اندرونی حلقے میں شامل لوگ غیر متزلزل وفاداری کے پابند ہوتے ہیں، جس سے رہنما کو بغیر کسی رکاوٹ کے حکمرانی کا موقع ملتا ہے۔ یہ صورتحال اس طرح کا پروپیگنڈا پیدا کرتی ہے جہاں صرف رہنما کا نقطہ نظر پھیلایا جاتا ہے۔ اس سے لیڈر کی عوام میں بے پناہ مقبولیت قائم ہوتی ہے۔ اپنے عروج کے وقت، عوامی رہنما اکثر ناقابل شکست نظر آتے ہیں۔ ان کا بیانیہ شدت اختیار کر لیتا ہے، ان کے حامی پرجوش ہو جاتے ہیں، اور وہ عوام کی ایک بڑی تعداد کی وفاداری حاصل کر لیتے ہیں۔ اس مرحلے تک پہنچتے ہوئے، وہ اپنے آپ کو قوم کے نجات دہندہ کے طور پر پیش کرتے ہیں۔ 
نازی جرمنی کی کہانی اس بات کا واضح ثبوت ہے کہ کس طرح ایک عوامی رہنما قوم کی کمزوریوں کا فائدہ اٹھا کر، خوف و ہراس پیدا کر کے بالآخر تباہی کے راستے پر لے جا سکتا ہے۔ ایڈولف ہٹلر نےعالمی جنگ اول کے بعد کے معاشرتی، اقتصادی اور سیاسی انتشار کا فائدہ اٹھا کر جرمنی میں اقتدار حاصل کر لیا اور اسے بربادی کی طرف دھکیل دیا۔ یہ تاریخ کا وہ سبق ہے کہ کس طرح عوامی رہنما قوم کی کمزوریوں کو نشانہ بناتے ہیں، جمہوری اداروں کو کمزور کرتے ہیں، آمرانہ کنٹرول مسلط کرتے ہیں اور نتیجتاً تباہی کے نقوش چھوڑ جاتے ہیں۔
ہٹلر نے عالمی جنگ اول کے بعد عوامی رہنما کے طور پر ابھرتے ہوئے جرمنی کی عظمت کی بحالی کا وعدہ کیا۔ اپنی جوشیلی تقاریر میں اس نے قوم کو شفا دینے، اس کے دشمنوں کو زیر کرنے اور جرمنی کی عظمت کو بحال کرنے کا عزم کیا۔ اس کا پیغام سیدھا تھا اور عوام کے جذبات کو براہ راست متاثر کرتا تھا: جرمنی کو نقصان پہنچا ہے، اور صرف وہی اسے درست کر سکتا ہے۔ ہٹلر کے عوامی بیانیے میں فوری حل کا وعدہ کیا گیا اور بیرونی قوتوں کو الزام دیا گیا، جس نے اقلیتوں اور غیر ملکی طاقتوں کو آسان شکار بنا دیا۔
ہٹلر کے عروج کا ایک اہم پہلو اس کی پروپیگنڈا کی مہارت تھی۔ اس نے جانا کہ عوامی رائے کو تشکیل دینا اس کی مقبولیت کو مضبوط کرنے کے لیے ضروری ہے۔ اپنے پروپیگنڈا وزیر جوزف گوئبلز کے ساتھ مل کر، اس نے نازی نظریے کو جرمن معاشرت میں سرایت کرنے کے لیے ایک جامع میڈیا حکمت عملی تیار کی۔ انہوں نے ایک فضا پیدا کی جہاں اختلاف کی کوئی گنجائش نہ تھی، اور صرف نازی پیغام گونجتا تھا۔ میڈیا، آرٹ، ادب اور یہاں تک کہ تعلیمی نصاب نازی اصولوں کا ذریعہ بن گئے، جن میں قوم پرستی، نسلی برتری، اور ہٹلر کی غیر متزلزل وفاداری کے پیغامات شامل تھے۔ یہ پروپیگنڈا کے طریقے جدید دور میں بھی نظر آتے ہیں، جہاں سوشل میڈیا کے ذریعے اثر و رسوخ پھیلانے اور بیانیے کو تشکیل دینے کے طاقتور ہتھیار بن چکے ہیں۔
نازی جرمنی کا عروج و زوال اس بات کا سبق ہے کہ خوف، نفرت، اور ایک رہنما کی غیر منطقی خواہش کے تحت عوامیت پسندی کے کس قدر تباہ کن نتائج ہو سکتے ہیں۔ ہٹلر کی عوامی جذبات کو ہموار کرنے، جمہوری اداروں کو تباہ کرنے، اور اپنی مرضی کو لوگوں پر مسلط کرنے کی مہارت نے جرمنی کو بربادی کی طرف دھکیل دیا۔ اس کا دور حکومت ایک تنبیہ ہے کہ کس طرح ایک عوامی رہنما قوم کی کمزوریوں کو استعمال کر سکتا ہے اور قوم کی عظمت اور طاقت کو بحال کرنے کے بہانے اس کے بنیادی ڈھانچے کو توڑ سکتا ہے۔یہ تاریخی باب ہمیں انتباہ کرتا ہے کہ جابرانہ رجحانات کے خلاف چوکنا رہنا، مضبوط جمہوری ادارے قائم رکھنا، اور ایک باخبر اور متحرک شہری کا ہونا کس قدر ضروری ہے۔ یہ سبق آج بھی قابل قدر ہے، کیونکہ دنیا بھر کے معاشرے ان رہنماﺅں کے دلفریب چکمے میں آتے رہتے ہیں جو پیچیدہ مسائل کے لیے آسان حل پیش کرتے ہیں۔ 
ججوں، جرنیلوں، اور سرکاری اہلکاروں کو ہراساں کرنا وہ حربے ہیں جو تاریخ میں نازی حکومت اور کئی عوامی رہنماﺅں نے استعمال کیے۔ لندن میں ایک خاص جماعت کے حامیوں کی جانب سے معزز سابق چیف جسٹس قاضی فائز عیسیٰ کو ہراساں کرنا قابل۔ مذمت فعل ہے۔ یہ واقعہ صرف جسٹس عیسیٰ کے خلاف نہیں تھا؛ بلکہ اس کا مقصد موجودہ عدلیہ کو یہ پیغام دینا تھا کہ”اگر آپ ہمارے خلاف گئے تو ریٹائرمنٹ کے بعد دیکھ لیں کہ ہم کیا کر سکتے ہیں۔“ ذاتی طور پر، مجھے کسی بھی مقبول رہنما پر کوئی اعتراض نہیں، لیکن عوامیت کو کبھی بھی معاشرتی روایات اور معاشرتی تانے بانے کو بگاڑنے کے بہانے کے طور پر استعمال نہیں کیا جانا چاہیے، ورنہ یہ قوم کو عراق، شام، یا لیبیا کی طرح خطرناک راستے پر ڈال دے گا۔