گلشن اقبال، تلخ کلامی پر موٹر سائیکل سوار نے ساتھ بیٹھی لڑکی قتل کر دی 

لاہور (نامہ نگار) موٹر سائیکل سوار نوجوان نے تلخ کلامی پر اپنے ساتھ بیٹھی 30سالہ لڑکی کو چہرے پر گولی مار کر قتل کر دیا۔ تفصیلات کے مطابق گلشن اقبال کے علاقے میں کریم بلاک گول چکر کے قریب موٹر سائیکل پر سوار نامعلوم شخص نے اپنے ساتھ موٹر سائیکل پر پیچھے بیٹھی لڑکی کو موٹر سائیکل سے نیچے اتار کر فائرنگ کر دی۔ اس دوران ایک گولی خاتون کے چہرے پر لگی اور وہ موقع پر ہی جاں بحق ہو گئی۔ پولیس نے جائے وقوعہ پر پہنچ کر فرانزک ٹیم کی مدد سے شواہد اکٹھے کئے اور لاش قبضے میں لے کر پوسٹ مارٹم کے لئے مردہ خانے منتقل کر کے تفتیش شروع کر دی۔ سی سی ٹی وی کیمروں کی مدد سے ملزم کی تلاش شروع کر دی۔ تاہم مقتولہ خاتون کی شناخت نہیں ہو سکی ہے۔