ڈیرہ غازی خان (نوائے وقت رپورٹ ،این این آئی) پنجاب کے ضلع ڈیرہ غازی خان کے علاقے سخی سرور روڈ پر تیز رفتاری کے باعث وین اور ٹرک میں تصادم کا واقعہ پیش آیا ہے۔ ریسکیو حکام کے مطابق وین اور ٹرک میں تصادم کے نتیجے میں نجی سکول پرنسپل سمیت 4 خواتین ٹیچرز موقع پر دم توڑ گئیں جبکہ 7 افراد زخمی ہو گئے۔ واقعے کی اطلاع ملتے ہی ریسکیو ٹیمیں موقع پر پہنچ گئیں اور تمام زخمیوں کو ہسپتال منتقل کر دیا جن میں سے 5 کی حالت تشویشناک بتائی جا رہی ہے۔ ریسکیو کے مطابق جاں بحق ہونے والوں میں پرنسپل سید امجد، ٹیچرز کرن، نوشین اور طاہرہ شامل ہیں۔