ون ڈے سیریز: 9 قومی کرکٹرز دبئی پہنچ گئے‘ امام الحق کو کارکردگی پر منتخب کیا: انضمام الحق

لاہور(نمائندہ سپورٹس ) سری لنکا کے خلاف ون ڈے سیریز میں حصہ لینے کیلئے پاکستانی کرکٹرز لاہور سے دبئی پہنچ گئے۔کرکٹرز میں محمد حفیظ،احمد شہزاد،فخر زمان، شاداب خان،جنید خان،عماد وسیم، رومان رئیس،فہیم اشرف اور امام الحق شامل ہیں۔شعیب ملک پہلے سے ہی دبئی میں موجود ہیںتاہم روانگی سے قبل محمد حفیظ نے اپنی بیٹیوں کے ہمراہ سیلفیز بنوائیں جبکہ جنید خان، امام الحق اور رومان رئیس نے جہاز میں سیلفیزبنائیں۔پاکستان کرکٹ بورڈ کی سلیکشن کمیٹی کے سربراہ انضمام الحق نے کہاہے کہ امام الحق کی سلیکشن اس لیے مشکل تھی کہ وہ ان کا بھتیجا ہے لیکن اگر ان کی کارکردگی دیکھی جائے تو یہ سلیکشن قطعاً مشکل نہیں تھی۔حالیہ دنوں جتنے اوپنرز نے کارکردگی دکھائی ہے ان میں امام الحق کی کارکردگی اچھی تھی اور وہ ٹیم میں منتخب ہونے کے حقدار تھے لہذا اس سلیکشن کو صرف اس نظر سے نہ دیکھا جائے کہ وہ میرا بھتیجا ہے۔ سلیکشن کے وقت یہ دیکھا گیا کہ امام الحق میں کتنا ٹیلنٹ ہے اور پھر یہ کہ قائداعظم ٹرافی میں اس کی کارکردگی دوسرے کرکٹرز سے اچھی تھی۔