ہماری قیادت پاکستانیوں کیلئے اقدامات کر رہی ہے: خالد محمود

شیخوپورہ (نمائندہ نوائے وقت) شیخوپورہ وزیراعظم عمران خان کے گرین اینڈ کلین پاکستان پروگرام کے تحت صوبائی وزیرقدرتی آفات پنجاب میاں خالد محمود اور سٹی صدر تحریک انصاف میاں تیمور نے میاں خالد محمود انڈرپاس سے ملحقہ وارث پارک میں پودے لگائے اور پارک کی تعمیرومرمت سمیت بچوں کی تفریح کیلئے جھولے لگانے کا اعلان کیا، اس موقع پر چیف آفیسر بلدیہ احسن عنایت سندھو اور ملک منشاء سمیت دیگر افسران بھی موجود تھے جنہیں صوبائی وزیر نے پارک کی صفائی ستھرائی کا نظام موثربنانے کا حکم دیا، انہوںنے کہاکہ وزیراعظم عمران خان جیسا دوراندیش لیڈر کسی پارٹی کے پاس نہیں جن کے جذبہ حب الوطنی دیکھ کر یوں لگتا ہے کہ جیسے ہم سب سست ہیں لیکن عمران خان آج بھی کام کی رفتار اور یاداشت کے معاملہ میں بہت ہی مضبوط ہیں حریف جماعتوں نے ہمیشہ بیان بازیوں اور الزام تراشیوں میں عوام کو الجھا کر سیاست کی لیکن ہماری قیادت پورے پاکستان کے رہنے والوں کیلئے عملی اقدامات اٹھارہی ہے۔