میٹرک بورڈ، علوم شرقیہ کے سالانہ  امتحانی فارم جمع کرانے کا شیڈول جاری

کراچی (نیوز رپورٹر)ثانوی تعلیمی بورڈکراچی کے قائم مقام ناظم امتحانات عمران طارق نے علوم شرقیہ کے سالانہ امتحانات برائے سال 2022ء کے امتحانی فارم جمع کرانے کا شیڈول جاری کر دیا ہے۔ انہوں نے کہا کہ امتحانی فارم 12ستمبر سے 15نومبر 2022ء  تک900روپے بغیر لیٹ فیس کے جمع کئے جائیں گے۔ امتحانی فارم نیشنل بینک، عسکری کمرشل بینک، یونائیٹڈ بینک اور بورڈ آفس بوتھ سے حاصل کئے جا سکتے ہیں۔ یہ امتحانی فارم کمرہ نمبر 15 دوسری منزل بلاک A سے چیک ہونے کے بعد مندرجہ بالا بینکوں میں جمع ہوں گے جبکہ 16نومبرسے 30نومبر 2022ء تک لیٹ فیس کے ساتھ امتحانی فارم جمع کئے جائیں گے۔ یاد رہے کہ ادیب کے امتحان میں شرکت کیلئے امیدوار کی عمر امتحانی سال کی یکم اکتوبر کو کم ازکم پورے 15 سال ہونی چاہئے۔ یہ امتحانات دسمبر 2022ء کے تیسرے ہفتے میں منعقد کئے جائیں گے۔