لاہور (نیوزرپورٹر+نوائے وقت رپورٹ) وزیر اعلیٰ مریم نواز شریف نے پیرس پیرا لمپکس میں کانسی کا تمغہ حاصل کرنے پر حیدر علی کو مبارکباد دی ہے۔ اعلیٰ کارکردگی پر حیدر علی کو شاباش دی ہے۔ انہوں نے کہاکہ پیرس پیرا لمپکس میں کامیابی نشان منزل ہے۔ منزل حاصل کرنے کے لئے خوب محنت کریں۔ حیدر علی جیسے ایتھلیٹ دوسروں کے لئے قابل تقلید مثال ہیں۔ علاوہ ازیں وزیراعلیٰ نے یوم فضائیہ پر اپنے پیغام میں کہا ہے کہ پاک فضائیہ کے شاہینوں کو سلام پیش کرتے ہیں۔ 7 ستمبر پاک فضائیہ کے شاہینوں کے پیشہ ورانہ مہارت اور لازوال قربانیوں کوخراج تحسین پیش کرنے کا دن ہے۔ 7 ستمبر 1965ء کا دن پاک فضائیہ کی تاریخ کا روشن باب ہے۔ پاک فضائیہ کے شاہین صفت پائلٹ ایم ایم عالم نے 1965ء کی جنگ میں ایک منٹ میں 5 بھارتی طیارے تباہ کر کے ریکارڈ بنایا۔ راشد منہاس شہید نے جرات، شجاعت اور بہادری کی داستان رقم کی۔ پاک فضائیہ کا ناقابل فراموش کردار دفاعی تاریخ میں سنہری حروف سے لکھا جائے گا۔ قوم کو پاک فضائیہ کے شاہینوں کی پیشہ ورانہ صلاحیتوں اور جرات و بہادری پر فخر ہے۔