پیرمحل (نامہ نگار) وین ٹریکٹر ٹرالی سے جا ٹکرائی، حادثہ میں 1طالبہ سمیت 4طلبہ جاں بحق جبکہ 5شدید زخمی، حادثہ پر علاقہ کی فضاء سوگوار ہوگئی۔ تفصیلات کے مطابق پیر محل سے 1کلو میٹر دور شورکوٹ روڈ پر واقع موٹر وے انٹر چینج کے قریب 341 گ ب ننگلاں سے آنے والا کیری ڈبہ تیز رفتاری کے باعث بے قابو ہو کر سامنے سے آنے والی ٹریکٹر ٹرالی سے جا ٹکرایا جس کے نتیجہ میں مذکورہ وین میں سوار نجی سکول کے 4طلبہ محمد معیز عمر 4سال، طالبہ حسنہ پرویز  11سال، محمد احمد ولد محمد آصف عمر 7سال اور محمد احمد ولد محمد رمضان عمر 17سال  جاں بحق ہوگئے۔ حاشر جمیل، ایان، فیضان، حورین، حسنین، نائلہ، ایمان فاطمہ، مناہل، ہادیہ  اور وین ڈرائیور عدنان  شدید زخمی ہو گئے۔ ذرائع کے مطابق  وین کا ڈرائیور عدنان  موبائل پر بات کر رہا تھا کہ تیز رفتاری پر قابو نہ رکھ سکا اور المناک حادثہ پیش آگیا۔ حادثہ پر پرائیویٹ سکول ایسوسی ایشن نے آج  9اپریل بروز منگل کو ایک روزہ سوگ کا اعلان کرتے ہوئے تعلیمی ادارے بند رکھنے کا فیصلہ کیا۔