کوئٹہ ؍ پشاور (نوائے وقت رپورٹ) کچلاک میں دھماکے میں ایک پولیس اہلکار شہید ہو گیا۔ ایس ایس پی آپریشنز کے مطابق دھماکے میں پانچ پولیس اہلکاروں سمیت گیارہ افراد زخمی ہوئے۔ کچلاک کے علاقے کلی کیتر میں دہشتگردی کے کوئی شواہد نہیں ملے۔ ابتدائی تحقیقات کے مطابق کچلاک میں مسجد کے حجرے میں دھماکہ گیس لیکیج کے باعث ہوا۔ پشاور کے علاقے بڈھ بیر میں نامعلوم افراد کی فائرنگ سے پولیس افسر شہید ہو گیا۔ پولیس کے مطابق اے ایس آئی معروف شاہ  نماز تراویح کے بعد گھر جا رہے تھے کہ ان پر فائرنگ کی گئی جس سے وہ شہید ہو گئے۔ دریں اثناء چوڑ کے ناؤگئی بازار میں فائرنگ کے واقعہ میں ایک شخص جاں بحق اور دو افراد زخمی ہو گئے۔ ڈیرہ اسماعیل خان کے محلہ خدمتگاراں میں گھر میں آگ لگ گئی۔ پولیس کے مطابق آگ کے باعث جھلس کر دو بچے جاں بحق ہو گئے۔