لاہور ( سپورٹس رپورٹر) پاکستان ہاکی ٹیم کے لیجنڈ کھلاڑی اولمپئن خواجہ ذکاء الدین کو پاکستان ہاکی فیڈریشن کی جانب سے خراج تحسین پیش کیا گیا۔سیکرٹری جنرل پاکستان ہاکی فیڈریشن حیدر حسین، اولمپئن ناصر علی، سیکرٹری پنجاب ہاکی ایسوسی ایشن کرنل (ر) آصف ناز کھوکھر، ڈی ایس پی قدیربشیر انٹرنیشنل کی لیجنڈ اولمپین خواجہ ذکاء الدین کے گھر آمد پر سلمان ذکاء نے انکا پرجوش استقبال کیا۔ خواجہ ذکاء الدین نے شرکاء کو دیکھ کر خوشگوار حیرت و خوشی کا اظہار کیا۔ حیدر حسین اور خواجہ ذکاء الدین کی ملاقات کے موقع پر جذباتی مناظر دیکھنے کو ملے۔ کرنل (ر) آصف ناز کھوکھر نے لیجنڈ اولمپین خواجہ ذکاء الدین کو سپاس نامہ پڑھ کر سنایا۔ خواجہ ذکاء الدین نے سیکرٹری پی ایچ ایف حیدر حسین اور دیگر وفد کے شرکاء کا شکریہ ادا کیا۔ انہوں نے ہاکی سے وابستہ یادوں کو تازہ کیا اور ماضی کے واقعات سنائے۔ اس موقع پر انہوں نے کہا کہ سیکرٹری جنرل پی ایچ ایف حیدر حسین کی آمد پر بہت اچھا محسوس کررہا ہوں، آپکی آمد سے میرا دل باغ باغ ہوگیا اور آج مجھے نیند بھی بہت اچھی آئیگی۔ اولمپین خواجہ ذکاء الدین نے قومی کھیل کی نمائندگی کرتے ہوئے 1960 روم اولمپکس میں گولڈمیڈل 1964 ٹوکیو اولمپکس میں سلور میڈل، 1958 اور 19662 ایشین گیمز میں گولڈ میڈلز اور 1966 بنکاک میں ہونے والی ایشین گیمز میں سلور میڈ ل حاصل کیا۔ اولمپین خواجہ ذکاء الدین کو حکومت کی جانب سے اعلی سول اعزاز پرائیڈ آف پرفارمنس سے بھی نوازا گیا جبکہ اولمپین خواجہ ذکاء الدین نے بطور ہیڈ کوچ اور منیجر قومی ہاکی سکواڈز کیساتھ بھی ذمہ داریاں نبھائیں۔ خواجہ ذکاء الدین اولمپین ناصر علی سمیت سیکرٹری پی ایچ ایف حیدر حسین کے بھی کوچ اور منیجر رہے۔