لاہور (سپورٹس رپورٹر) چیف آف نیول سٹاف گالف چیمپئن شپ میں کوچنگ اور کیڈی بن کر گزر بسر کرنے والے گالفر محمد قاسم نے 2 کروڑ روپے کی قیمتی گاڑی جیت لی۔ محمد قاسم ڈی ایچ ایف گالف کلب کراچی کے پروفیشنلز گالفرز ہیں جو گالف کی کوچنگ اور کیڈی کے فرائض سر انجام دیتے ہیں۔ گالفر محمد قاسم نے چیمپئن شپ میں ہول ان ون کا کارنامہ انجام دے کر 2 کروڑ روپے کی گاڑی جیت لی ہے۔ محمد قاسم نے کراچی گالف کلب کے ریڈ کورس کے ہول نمبر تین پر کیا۔ محمد قاسم کا کہنا تھا کہ خالی ہاتھ آیا تھا قیمتی گاڑی جیت لی لیکن گاڑی چلانا نہیں آتی کیونکہ میں موٹر سائیکل چلاتا ہوں۔ گاڑی تو جیت لی پٹرول کا خرچہ نہیں اٹھا سکتا، لہٰذا، اس گاڑی کو فروخت کر کے گھر کے حالات بہتر بناؤں گا۔