وزیراعظم شہباز شریف کی ارشد ندیم کو پاکستان کیلئے تاریخ رقم کرتے ہوئے براہ راست ٹی وی اسکرین پر دیکھنے اور فرط جوش کے ساتھ جشن مسرت منانے کی ویڈیو وائرل ہوگئی۔یہ ویڈیو وزیر اعظم شہباز شریف کے پرسنل تصدیق شدہ فیس بک پیج پر پوسٹ کی گئی، ویڈیو میں دیکھا جاسکتا ہے کہ وزیر اعظم شہباز شریف کے ساتھ ان کے مشیر امور نوجوانان رانا مشہود بھی موجود ہیں اور جیسے ہی ارشد ندیم ریکارڈ بناتے ہیں تو شہباز شریف اپنی نشست سے جشن مناتے ہوئے پورے جوش کے ساتھ کھڑے ہوجاتے ہیں۔
وزیراعظم کے ساتھ موجود رانا مشہود بھی ان کے ساتھ جشن منا رہے ہیں اور اسکرین پر ارشد ندیم کو ریکارڈ تھرو کے بعد سجدہ شکر بجا لاتے ہوئے بھی دیکھا جاسکتا ہے۔پیرس اولمپکس میں ارشد ندیم کی گیم کی باری رات گئے پاکستانی وقت کے مطابق بارہ بجے کے قریب آئی۔ رات کے اس پہر وزیر اعظم نے بڑے انہماک کے ساتھ ان کی گیم دیکھنے کا انتظار کیا۔وزیراعظم شہباز شریف نے ارشد ندیم کی کام یابی پر مبارک باد بھی دی. اس کے علاوہ صدر آصف علی زرداری، وزیراعلیٰ پنجاب مریم نواز، وزیراعلیٰ سندھ، آرمی چیف اوردیگر شخصیات نے ارشد ندیم کی کامیابی پر مبارک باد دی تھی۔