لاہور(سپورٹس رپورٹر ) فیفا ورلڈ کپ 2022 کی کوارٹر فائنل لائن اپ مکمل ہوگئی، ورلڈ کپ کے کوراٹر فائنل مقابلے 9 اور 10 دسمبر کو کھیلے جائیں گے۔ شیڈول کے مطابق پہلا کوارٹر فائنل آج 9 دسمبر کو برازیل اور کروشیا کے درمیان کھیلا جائے گا، دونوں ٹیمیں قطر کے ایجوکیشن سٹی سٹیڈیم میںآمنے سامنے آئیں گی، پاکستانی وقت کے مطابق دونوں ٹیموں کے درمیان مقابلہ رات 8 بجے شروع ہوگا۔ورلڈ کپ کا دوسرا کوارٹر فائنل بھی 9 دسمبر کو کھیلا جائیگا جس میں ارجنٹائن اور نیدرلینڈز کی ٹیمیں لوسیل سٹیڈیم میں مدمقابل ہونگی، پاکستانی وقت کے مطابق میچ رات 12 بجے شروع ہوگا۔شیڈول کے مطابق تیسرا کوارٹر فائنل مقابلہ 10 دسمبر کو مراکش اور پرتگال کی ٹیموں کے درمیان التہمامہ سٹیڈیم میں کھیلا جائیگا ، میچ پاکستانی وقت کے مطابق رات 8 بجے شروع ہوگا، چوتھا کوارٹر فائنل اسی روز انگلینڈ اور فرانس کے درمیان 12 بجے البیت سٹیڈیم میں کھیلا جائیگا۔
فائنل 8 میں جگہ بنانے والی ٹیموں میں برازیل نے سب سے زیادہ 5 ٹائٹلز جیتے ہیں، ارجنٹائن اور فرانس نے 2، 2 مرتبہ چمچماتی سنہری ٹرافی کو ہاتھوں میں تھاما، انگلینڈ نے واحد ٹائٹل 1966 میں جیتا تھا، نیدرلینڈز،کروشیا، مراکش اور پرتگال نے ابھی تک ایک بھی ٹرافی نہیں جیتی۔