لاہور(نمائندہ سپورٹس) وویمن سلیکشن کمیٹی نے ٹونٹی ورلڈکپ کیلئے پاکستان کرکٹ ویمن ٹیم کے اسکواڈ کو حتمی شکل دے دی۔ ذرائع کے مطابق منیبہ علی اور سدرہ امین سکواڈ میں جگہ بنانے میں کامیاب ہو گئی ہیں۔سلیکٹرز نے اسکواڈ فائنل کرکے حتمی منظوری کیلئے فہرست چیئرمین پی سی بی شہر یار خان کو بھیج دی۔دوسری طرف پاکستان کرکٹ بورڈ نے 21 خواتین کرکٹرز کیلئے سینٹرل کنٹریکٹ فہرست بھی تیار کرلی ہے۔ ذرائع کا کہنا ہے کہ ویمن کرکٹرز کو 4 کیٹیگری میں سینٹرل کنٹریکٹ دیا جائیگا۔ اے کیٹیگری میں شامل کرکٹرز کو ایک لاکھ، بی کو 80 ہزار روپے ماہانہ ملیں گے۔ جبکہ سی کیٹیگری کھلاڑیوں کو 50 اور ڈی کیٹیگری میں شامل وویمن کرکٹرز کو 35 ہزار روپے ملیں گے۔ ’’اے‘‘ کیٹیگری میں ثنا میر، بسمہ معروف، جویریہ ودود اور اسماویہ اقبال شامل ہیں۔ بی کیٹیگری میں ندا راشد، سعدیہ یوسف، سمیعہ صدیقی، مرینہ اقبال، نین عابدی شامل ہیں۔