لندن (اے پی پی) لارڈز کا تاریخی کرکٹ گرائونڈ ویمنز ورلڈ کپ 2017 کے فائنل مقابلے کی میزبانی کرے گا۔ آئی سی سی نے گزشتہ روز ویمنز ورلڈ کپ کے شیڈول اور وینیوز کا آعلان کر دیا۔ میگا ایونٹ آئندہ سال 26 جون سے 23 جولائی تک انگلینڈ میں کھیلا جائے گا جس میں آٹھ ٹیمیں حصہ لیں گی، ٹورنامنٹ سنگل لیگ کی بنیاد پر کھیلا جائے گا اور ہر ٹیم دوسری ٹیم کے خلاف ایک میچ کھیلے گی۔ لیگ مرحلے میں چار ٹاپ ٹیمیں سیمی فائنل کیلئے کوالیفائی کریں گی۔ آئی سی سی کے مطابق چار ٹیمیں ویمنز چیمپئن شپ سے جبکہ بقیہ چار ٹیمیں 2017 میں ہونے والے کوالیفائنگ رائونڈ سے ٹورنامنٹ کیلئے کوالیفائی کریں گی۔ ٹورنامنٹ کا فائنل لندن کے تاریخی گرائونڈ لارڈز میں کھیلا جائے گا۔