کراچی میں نوجوان کی ٹریفک اہلکار سے بدکلامی، ویڈیو وائرل آئی جی نے رپورٹ طلب کرلی

کراچی (نیٹ نیوز)کراچی میں نوجوان کی طرف سے پولیس اہلکار کو گالیاں دینے اور وردی اتروانے کی دھمکیاں دینے کی ویڈیو سامنے آگئی ہے۔ نجی ٹی وی کو موصولہ ویڈیو میں نوجوان پولیس اہلکار کو کہتا نظر آرہا ہے کہ تم مجھے جانتے نہیں ہو، میں تمہاری وردی اتروا دونگا۔ مشتعل نوجوان مسلسل ٹریفک اہلکار کو مغلظات بکتا رہا اور معافی مانگنے پر بضد رہا۔ ویڈیو سامنے آنے کے بعد آئی جی سندھ ڈاکٹر سید کلیم امام نے رپورٹ طلب کرلی ہے۔ ویڈیو سوشل میڈیا پر وائرل ہوئی تھی۔