سری نگر: مقبوضہ کشمیرمیں قابض بھارتی فوج کےمظالم کا سلسلہ جاری ہے۔ وادی میں کرفیواورلاک ڈاون 189 ویں روزمیں داخل ہوگیا ہے۔کشمیری آج حریت رہنما افضل گرو کی 7ویں برسی منائیں گے ۔
مقبوضہ وادی کشمیرمیں بھارت کی طرف سےمسلط کردہ غیرانسانی لاک ڈاون اور مواصلاتی بندش کے باعث مسلسل 189 ویں روز بھی معمولات زندگی بدستور مفلوج ہیں۔ سڑکیں سنسان، وادی میں دکانیں، کاروبار، تعلیمی مراکز بند ہیں اور لوگ گھروں میں محصور ہو کر رہ گئے ہیں۔ قابض بھارتی فوج نے کشمیریوں کی زندگی اجیرن بنا دی ہے اور ایک کروڑ سے زائد افراد دنیا کی سب سے بڑی جیل میں قید ہیں۔ وادی میں نام نہاد سرچ آپریشن اورپکڑ دھکڑ کا سلسلہ بھی جاری ہے ۔وادی میں خوراک اور ادویات کی قلت بھی برقرار ہے۔ بھارت نے مظلوم کشمیریوں پر ظلم وبربریت کا بازار گرم کر رکھا ہے اور ہزاروں کشمیریوں سمیت مقبوضہ وادی کی سیاسی قیادت کو بھی جیلوں میں بند کر رکھا ہے۔وادی میں موبائل فون، انٹرنیٹ سروس بند اور ٹی وی نشریات تاحال معطل ہیں۔ دوسری جانب مودی سرکار کشمیریوں کی تحریک آزادی کو دبانے میں ناکام ہےکشمیری کرفیو توڑ کر سڑکوں پر نکل آئے اور بھارت کے خلاف شدید نعرے بازی بھی کرتے رہے۔
دوسری جانب کشمیر میڈیا سروس کے مطابق آج کشمیری حریت رہنما افضل گرو کی 7ویں  برسی منائیں گے ۔ افضل گرو کی برسی کےموقع پر مقبوضہ کشمیرمیں شٹرڈاؤن ہڑتال کا اعلان کیا گیا ہے ۔ ہڑتال کی کال حریت رہنماؤں کی جانب سے دی گئی ہے۔تحریک آزادی کشمیرکےاہم رہنما افضل گرو کو نئی دہلی تہار جیل میں 9 فروری 2013کو پھانسی دی گئی تھی۔
واضح رہے کہ 5اگست کو مودی سرکار نے کشمیر کو خصوصی حیثیت دینے والے بھارتی آئین کے آرٹیکل 370 اے کو ختم کر کے مقبوضہ وادی میں کرفیو نافذ کر دیا تھا اور بھارت نے کشمیریوں کی نقل وحرکت پر پابندی عائد کر رکھی ہے۔یکم نومبر سے بھارتی شہریوں کو مقبوضہ کشمیر میں جائیداد خریدنے اور وہاں رہنے کا حق بھی حاصل ہو گیا ہے۔