راولپنڈی: پاک فوج کے ایوی ایشن پائلٹس نے گلیشئر میں پھنسے 2 غیرملکی کوہ پیماؤں کو کامیاب ریسکیو آپریشن کرتے ہوئے نکال لیا، امریکہ اور فن لینڈ کے کوہ پیما بلتورو گلیشئر میں ونٹر انٹرنیشنل مہم جوئی کے دوران پھنس گئے تھے۔
آئی ایس پی آر کے مطابق دو غیر ملکی کوہ پیما ایک مہم کے دوران بلتورو گلیشئر کے قریب شدید موسمی حالات کے سبب بیمار ہو گئے جس کے سبب ان کی زندگی کو خطرات لاحق ہو گئے، پاک فوج کے ایوی ایشن پائلٹس نے جان جوکھم میں ڈال کر ریسکیو آپریشن کیا اور دونوں کوہ پیماوں کو بحفاظت بیس کیمپ پہنچا دیا۔
غیرملکی کوہ پیماؤں میں امریکا کے ڈونلڈ ایلن اور فن لینڈ کی لوٹا ہنریکا شامل ہیں۔
