آسٹریلیا کے شان ٹیٹ ایک سال کیلئے باﺅلنگ کوچ مقرر،ٹیسٹ سکواڈ میں 2تبدیلیاں،اسپنر بلال آصف اور اوپنر عابد علی کی جگہ حارث رﺅف اور اوپنر شان مسعود اسکواڈ میں شامل
دونوں ٹیموں کے مابین سیریز کا پہلا ٹیسٹ میچ راولپنڈی (4تا 8مارچ)، دوسرا کراچی اور تیسرا لاہورمیں کھیلا جائے گا
پاکستان کرکٹ ٹیم کے چیف سلیکٹر نے آسٹریلیا کے خلاف3 ٹیسٹ میچز کی سیریز کیلئے 16کھلاڑیوں اور 5 ریزرو کھلاڑیوں پرمشتمل قومی اسکواڈ کا اعلان کردیا ہے جبکہ پی سی بی نے ثقلین مشتاق کو مزید 12ماہ کے لیے پاکستان کا ہیڈ کوچ مقرر کردیا ہے۔ محمد یوسف کو آسٹریلیا سیریز کے لیے بیٹنگ کوچ جبکہ شان ٹیٹ کو 12ماہ کے لیے پاکستان کا فاسٹ بالنگ کوچ مقرر کرنے کا بھی اعلان کردیا ہے۔ دونوں ٹیموں کے مابین سیریز کا پہلا ٹیسٹ میچ راولپنڈی (4تا 8مارچ)، دوسرا کراچی (12تا 16مارچ)اور تیسرا لاہور (21تا 25مارچ)میں کھیلا جائے گا۔آسٹریلیا کے خلاف ٹیسٹ سیریز کے لیے قومی ٹیسٹ اسکواڈ میں 3 تبدیلیاں کی گئی ہیں۔فاسٹ بالر حارث رﺅف اور اوپنر شان مسعود کی ٹیسٹ اسکواڈ میں واپسی ہوئی ہے۔حارث رﺅف جنوبی افریقہ اور زمبابوے کے خلاف قومی ٹیسٹ اسکواڈ کا حصہ تھے۔ شان مسعود نے آخری مرتبہ سیزن 21-2020میں دورہ نیوزی لینڈ میں پاکستان کی نمائندگی کی تھی۔ان دونوں کھلاڑیوں کو اسپنر بلال آصف اور اوپنر عابد علی کی جگہ اسکواڈ میں شامل کیا گیا ہے۔اسکواڈ میں شامل اکیسویں رکن یاسر شاہ کو ریزرو کھلاڑیوں میں شامل کیا گیا ہے۔قومی ٹیسٹ اسکواڈ میں شامل جو کھلاڑی ایچ بی ایل پی ایس ایل 2022کا حصہ نہیں ہیں وہ 16فروری سے نیشنل اسٹیڈیم کراچی میں تربیتی کیمپ کا حصہ بن جائیں گے۔قومی ٹیسٹ اسکواڈ میںبابر اعظم (کپتان)،محمد رضوان(نائب کپتان)،عبداللہ شفیق،اظہر علی،فہیم اشرف،فواد عالم،حارث رﺅف،حسن علی،امام الحق،محمد نواز،نعمان علی،ساجد خان ،سعود شکیل ،شاہین شاہ آفریدی،شان مسعود اورزاہد محمود شامل ہیں۔ریزرو پلیئرز میںکامران غلام ،محمد عباس ،نسیم شاہ ،سرفراز احمد،یاسر شاہ اورمحمد وسیم شامل ہیں۔چیف سلیکٹر پاکستان کرکٹ محمد وسیم کا کہنا ہے کہ آسٹریلیا کے خلاف ٹیسٹ سیریز کے لیے قومی ٹیسٹ اسکواڈ میں زیادہ تبدیلیاں کرنے کی بجائے ایک تسلسل برقرار رکھا گیا ہے۔انہوں نے کہا کہ اس سے نہ صرف کھلاڑیوں میں اعتماد بڑھے گا بلکہ یہ ان کی سال 2021میں عمدہ کارکردگی کا صلہ بھی سمجھا جائے گا۔محمد وسیم نے کہا کہ یہ ڈومیسٹک کرکٹ کے دستیاب بہترین، باصلاحیت اور سب سے ان فارم کھلاڑی ہیں۔ انہیں یقین ہے کہ منتخب کردہ تمام کھلاڑی آسٹریلیا کے خلاف سیریز میں شاندار کارکردگی کا مظاہرہ کریں گے۔اس دوران پاکستان کرکٹ بورڈ نے ثقلین مشتاق کو مزید 12ماہ کے لیے پاکستان کا ہیڈ کوچ مقرر کردیا ہے۔ محمد یوسف کو آسٹریلیا سیریز کے لیے بیٹنگ کوچ جبکہ شان ٹیٹ کو 12ماہ کے لیے پاکستان کا فاسٹ بالنگ کوچ مقرر کرنے کا بھی اعلان کردیا گیا ہے۔اسپورٹ اسٹاف میںمنصور رانا(منیجر)، ثقلین مشتاق (ہیڈ کوچ)، شاہد اسلم (اسسٹنٹ ٹو ہیڈ کوچ)، محمد یوسف (بیٹنگ کوچ)، شان ٹیٹ (فاسٹ بالنگ کوچ)، عبدالمجید (فیلڈنگ کوچ)، کلف ڈیکن (فزیو تھراپسٹ)، ڈریکس سائمن(اسٹرنتھ اینڈ کنڈیشنگ کوچ)، عماد احمد حمید(میڈیا اینڈ ڈیجیٹل منیجر)، کرنل(ر)عثمان انوری(سیکیورٹی منیجر)، طلحہ اعجاز(اینالسٹ)اور ملنگ علی (مساجر)شامل ہیں۔
