لاہور (خبر نگار) الیکشن کے روز سیاسی جماعتوں کی طرف  سے پولنگ ایجنٹس کے لیے پر تکلف ناشتے اور ووٹروں کو گھر سے لانے کے لیے ٹرانسپورٹ کا انتظام کیا گیا تھا جو صبح آٹھ بجے سے پہلے اپنے اپنے ایریا ز میں پہنچ گئی تھی جو پولنگ کے اختتام تک ووٹروں کو گھر سے لانے اور لے جانے کی سروس فراہم کرتے رہیں، ٹرانسپورٹ فراہم کرنے والے تمام سیاسی جماعتوں کی طرف سے پارٹی پرچم اور اپنے امیدواروں کی تصویریں آویزاں کی گئی تھیں۔ امیدواروں کی طرف سے نہ صرف پولنگ ایجنٹس بلکہ انتخابی مہم میں سرگرم رہنے والے رہنمائوں اور متحرک سپورٹرز کو بھی ناشتے کی دعوت دی گئی جن کی حلوہ پوری، سری پائے، نان چنے، پراٹھے، چائے اور لسی سے تواضع کی گئی۔