لاہور (مبشر حسین/ نیشن رپورٹ) راجہ ریاض نے اپنے شیف کی خدمات عمران خان کے سپرد کر دیں۔ مئی میں تحریک انصاف میں شامل ہونے والے پیپلزپارٹی کے سابق رہنما کے ڈیرے کے دورے کے موقع پر عمران خان راجہ ریاض کے کچن کے انتظامات کرنے والے چیف شیف سے متاثر ہوئے تھے۔ راجہ ریاض کے اس شیف نے اس عید پر عمران خان کو کھانے بنا کر پیش کئے۔ راجہ ریاض کے خاندانی ذرائع نے بتایا کہ راجہ ریاض کی پی ٹی آئی میں شمولیت سے قبل انہوں نے عمران خان کو اپنے ڈیرے پر آنے کی دعوت دی تھی جہاں انہیں پشتون کھانوں سمیت کئی ڈشز کھلائی گئیں۔ عمران ان کے کھانوں سے بڑا متاثر ہوئے۔ عمران نے کہا بڑا زبردست کُک ہے جس پر راجہ ریاض نے کہا آپ چاہیں تو یہ آپ کے کچن کے انتظامات بھی سنبھال سکتا ہے۔ دوسرے روز ریاض کا یہ باورچی بنی گالہ میں عمران خان کی خدمت میں مصروف تھا۔ اس عید پر عمران کے دوستوں نے بھی کھانوں اور شیف کو دل کھول کر داد دی۔