کراچی (اسپورٹس رپورٹر) رونالڈینیو اینڈ فرینڈز فیسٹول فٹ بال میچ رونالڈینیونائن نے جیت لیا۔ ہاکی کلب آف پاکستان اسٹیڈیم میں کھیلے گئے سنسنی خیز اور دلچسپ مقابلے میں رونالڈینیونائن نے حریف ٹیم گیگز نائن کو 2-1 گول سے شکست دی۔ کھیل کے پہلے ہاف میں رونالڈینیو الیون کی جانب سے پنالٹی شوٹ پر فرانس سے تعلق رکھنے والے ورلڈ کپ ونر اسٹرائیکر رابرٹ پیرس نے اپنی ٹیم کو برتری دلوا دی۔ اسی اسکور پر ہاف ٹائم ہوا۔ 9 اے سائیڈ میچ کے دوسرے ہاف میں گیگز نائن کے نکولس انلکا نے میچ برابر کر دیا۔ تاہم میچ ختم ہونے سے قبل رونالڈینیو نائن کے پاکستانی اسٹار سعد اللہ نے گول کر کے اسکور 2-1 کر دیا۔ اس شاندار اور تاریخی میچ کے ایک ایک لمحے سے شائقین فٹ بال نے لطف اُٹھایا خاص طور پر رونالڈینیو کے خوبصورت پاسز نے شائقین کو متاثر کیا۔ میچ دیکھنے کیلئے عوام کی بڑی تعداد شام 5 بجے ہی اسٹیڈیم آنا شروع ہو گئی تھی تاہم سخت سیکورٹی کی وجہ سے شائقین 9 بجے تک اسٹیڈیم میں اپنی نشستوں پر پہنچ سکے۔ اسٹیڈیم کے اطراف سخت سیکورٹی کا بندوست کیا گیا تھا‘ کھلاڑیوں کو وی وی آئی پی سیکورٹی فراہم کی گئی تھی۔ شائقین میں خواتین کی تعداد نمایاں تھی۔میچ کے آغاز سے قبل خوبصورت لیزر شو کا اہتمام کیا گیا تھا۔ واضح رہے کہ پاکستان میں یہ پہلا موقع تھا کہ انٹرنیشنل معیار کے لیزر شو سے شائقین محظوظ ہوئے۔ لیزر شو کے بعد وزیراعلیٰ سندھ سید مراد علی شاہ نے میدان میں آ کر باقاعدہ میچ کا افتتاح کیا۔ اس موقع پر انہوں نے منتظمین کو شاندار پروگرام کے انعقاد پر مبارکباد دی اور کہاکہ 70 سالہ پاکستان کی تاریخ میں پہلی بار اس طرح کے فٹ بال ایونٹ کا کریڈٹ ٹرنک والا گروپ اور ورلڈ گروپ کو جاتا ہے۔ انہوں نے کہاکہ محمود ٹرنک والا غیر ملکی فٹ بالرز کو پاکستان لا کر فٹ بال کے کھیل میں انقلاب لا چکے ہیں آج اسٹیڈیم میں موجود شائقین فٹ بال کی دلچسپی دیکھ کر اندازہ ہوتا ہے کہ ہمارے نوجوان اسپورٹس سے محبت کرتے ہیں۔