کراچی (اسپورٹس رپورٹر) رونالڈینیو اینڈ فرینڈز فیسٹول فٹ بال میچ رونالڈینیو الیون نے جیت لیا۔ ہاکی کلب آف پاکستان اسٹیڈیم میں کھیلے گئے سنسنی خیز اور دلچسپ مقابلے میں رونالڈینیو الیون نے حریف ٹیم گیگز الیون کو 2-1 گول سے شکست دی۔ کھیل کے پہلے ہاف میں رونالڈینیو الیون کی جانب سے پنالٹی شوٹ پر فرانس سے تعلق رکھنے والے ورلڈ کپ ونر اسٹرائیکر رابرٹ پیرس نے اپنی ٹیم کو برتری دلوا دی۔ اسی اسکور پر ہاف ٹائم ہوا۔ 9 اے سائیڈ میچ کے دوسرے ہاف میں گیگز الیون کے نکولس انلکا نے میچ برابر کر دیا۔ تاہم میچ ختم ہونے سے قبل رونالڈینیو الیون کے پاکستانی اسٹار سعد اللہ نے گول کر کے اسکور 2-1 کر دیا۔ اس شاندار اور تاریخی میچ کے ایک ایک لمحے سے شائقین فٹ بال نے لطف اُٹھایا خاص طور پر رونالڈینیو کے خوبصورت پاسز نے شائقین کو متاثر کیا۔ میچ دیکھنے کےلئے عوام کی بڑی تعداد شام 5 بجے ہی اسٹیڈیم آنا شروع ہو گئی تھی تاہم سخت سیکورٹی کی وجہ سے شائقین 9 بجے تک اسٹیڈیم میں اپنی نشستوں پر پہنچ سکے۔ اسٹیڈیم کے اطراف سخت سیکورٹی کا بندوست کیا گیا تھا‘ کھلاڑیوں کو وی وی آئی پی سیکورٹی فراہم کی گئی تھی۔ میچ کے آغاز سے قبل خوبصورت لیزر شو کا اہتمام کیا گیا تھا۔ لیزر شو کے بعد وزیراعلیٰ سندھ سید مراد علی شاہ نے میدان میں آ کر باقاعدہ میچ کا افتتاح کیا۔