ورلڈ انڈر 21 سنوکر چیمپئن شپ، پاکستانی کیوئسٹ حارث طاہر اور محمد نسیم ناک آئوٹ مرحلے میں

بیجنگ (اے پی پی) پاکستانی کیوئسٹس حارث طاہر اور محمد نسیم فتوحات برقرار رکھتے ہوئے آئی بی ایس ایف ورلڈ انڈر 21 سنوکر چیمپئن شپ ناک آئوٹ مرحلے میں پہنچ گئے، حارث طاہر فتوحات کی ہیٹرک کے ساتھ ایونٹ میں ناقابل شکست ہیں، محمد عمر خان کو متواتر تیسری شکست کا سامنا کرنا پڑا۔ چین میں جاری ایونٹ میں اتوار کو کھیلے گئے گروپ کیو میں پاکستانی کیوئسٹ حارث طاہر نے عمدہ کارکردگی کا مظاہرہ کرتے ہوئے حریف تھائی لینڈ کے کیوئسٹ کیساڈا کو سخت مقابلے کے بعد 3-2 فریمز سے شکست دے کر مسلسل دوسری کامیابی سمیٹی، اس کے بعد حارث نے تیسرے اور آخری گروپ میچ میں بیلجیئم کے کیوئسٹ سائبرین کو بھی زبردست مقابلے کے بعد 3-2 فریمز سے ہرا کر فتوحات کی ہیٹرک مکمل کی اور اس کے ساتھ ہی ناک آئوٹ مرحلے کا ٹکٹ کٹوا لیا۔