سرفراز احمد نے پاکستانی ٹی 20 ٹیم کو ناقابل تسخیر بنا دیا

لاہور ( سپورٹس رپورٹر) سرفراز احمد نے پاکستانی ٹی 20ٹیم کو ناقابل تسخیر بنا دیا، جولائی2016سے اب تک گرین شرٹس نے26میچز میں22فتوحات سمیٹیں جبکہ بائولرز نے 7کے قریب اوسط سے رنز دیئے۔گزشتہ 2سال میں کھیلے جانیوالے ٹی ٹوئنٹی میچز میں پاکستان کی کارکردگی میں خاصا تسلسل نظر آیا،اس کا کریڈٹ سرفراز احمد کی اعلیٰ قیادت کو بھی جاتا ہے، اسی بنا پرگرین شرٹس نے عالمی نمبر ون پوزیشن پر قبضہ جمایا۔ٹی ٹونٹی کرکٹ کو عام طور پر ناقابل اعتبار فارمیٹ سمجھا جاتا ہے لیکن پاکستان نے اس میں بہترین کارکردگی کا مظاہرہ کرتے ہوئے جولائی 2016 سے اب تک 26میچز میں 22فتوحات سمیٹی ہیں، ان میں بائولرز نے بھی بھرپورکردار نبھایا،انھوں نے 7.03 کی اوسط سے رنز دیے، دیگر 11میں سے9ٹیموں نے فی اوور 8یا اس سے زائد رنز دیئے ہیں۔پاکستانی بائولرز نے دیگر تمام ملکوں کی بانسبت بہترین اوسط 18.39کی اوسط سے وکٹیں اڑائیں، پہلے 6اوورز میںبائولرز نے سب سے بہتر اکانومی ریٹ 6.50 سے اوورز اور 21.57کی اوسط سے شکار کیے۔دوسرے نمبر پر بھارت ہے، چھٹے سے 15ویں اوور تک اکانومی ریٹ 6.76کے ساتھ افغانستان کے بعد پاکستان دوسرے نمبر پر ہے،درمیانی اوورز میں شاداب خان 28 وکٹوں کیساتھ سرفہرست ہیں،ہر طرح کی کنڈیشنز میں پاکستانی پیسرز نے اپنی صلاحیتوں کا بھرپور اظہار کرتے ہوئے گذشتہ 2سال میں 7.26کے اکانومی ریٹ اور 21.36 کی اوسط سے 96وکٹیں اڑائیں۔سپنرز نے 6.30 کے اکانومی ریٹ اور 18.77کی ایوریج سے 66 پلیئرز کو پویلین بھیجا،پیسرز نے فاسٹ بائولرز پیدا کرنے کیلیے مشہور آسٹریلیا کو پیچھے چھوڑ دیا جبکہ سپنرز افغانیوں کے بعد دوسرے نمبر پر ہیں۔