اسلام آباد(نا مہ نگار)وفاقی اردو یونیورسٹی اسلام آباد کیمپس میں جامع مسجد یونس کا سنگ بنیاد پروفیسر ڈاکٹر روبینہ مشتاق نے رکھا۔ افتتاحی تقریب میں انچارج اسلام آباد کیمپس ڈاکٹر عامر ندیم، ایڈیشنل رجسٹرار شاہ جی محمد اور وفاقی اردو یونیورسٹی اسلام آباد کے تمام شعبہ جات کے سربراہان و ملازمین موجود تھے۔ مسجد کے لئے چار کنال زمین موضع موہریاں کے مقامی زمیندار سردار محمد توقیر نے وقف کی ہے۔ وائس چانسلر وفاقی اردو یونیورسٹی نے اس موقع پرتشکر کے جذبات کا اظہار کرتے ہوئے کہا کہ الحمداللہ وفاقی اردو یونیورسٹی اسلام آباد کو درپیش تمام مسائل ایک ایک کر کے حل ہورہے ہیں۔ آج اللہ تعالی نے ان کو یہ موقع دیا ہے کہ وہ اللہ کے گھر کا سنگ بنیاد اپنے ہاتھوں سے رکھ رہی ہیں ۔ انہوں نے امید ظاہر کی کہ مسجد کی تعمیر جلد مکمل ہوگی ۔ وائس چانسلر نے وفاقی اردو یونیورسٹی کے تمام اساتذہ و انتظامی افسران کو کہا کہ وہ سب مل کر ادارے کی تعمیر و ترقی میں اپنا کردار کریں ۔