گوجرہ + چیچہ وطنی+ کوہاٹ (نمائندگان + نوائے وقت رپورٹ) ٹریفک حادثات میں 2 خواتین سمیت سات افراد جاں بحق ہو گئے۔ تفصیلات کے مطابق تھانہ نواں لاہور گوجرہ میں ڈالہ اور کنٹینر میں ٹکر ہوگئی‘ جس کے نتیجے میں  ارسلان اور مشتاق موقع پر ہی جاں بحق ہو گئے۔ چیچہ وطنی بائی پاس روڈ پر کوئٹہ سے لاہور جانے والی رینٹ کی ایک کار موٹر سائیکل کو بچاتے بے قابو ہو کر درخت سے ٹکرا گئی۔ دو خواتین کوثر اور اس کی بیٹی نشاء موقع پر ہی جاں بحق جبکہ کوئٹہ کے رہائشی نیشنل انڈسٹریل ریلیشن کمشن (این آئی آر سی) کے جج عبدالغنی مینگل اور ڈرائیور محمد مصطفیٰ زخمی ہو گئے جنہیں تحصیل ہسپتال منتقل کر دیا گیا۔ کوہاٹ میں درہ آدم خیل انڈس ہائی وے پر ٹریلر اور گاڑی میں ٹکر ہو گئی۔ پولیس کے مطابق حادثے میں 3 افراد جاں بحق جبکہ 10 زخمی ہو گئے۔ زخمیوں کو ہسپتال منتقل کر دیا گیا۔