پالے کیلی (اے پی پی) پاکستان اور سری لنکا کے درمیان دوسرا ون ڈے میچ آج پالے کیلی میں کھیلا جائے گا، میچ ڈے اینڈ نائٹ ہوگا اور پاکستانی وقت کے مطابق دن دو بجے شروع ہوگا۔ کپتان مصباح الحق نے کہا ہے کہ سری لنکا کے خلاف پہلے ایک روزہ میچ میں فتح سے ٹیم کا مورال بلند ہوا ہے، دوسرے میچ میں میزبان ٹیم کو آسان حریف تصور کرنے کی غلطی نہیں کریں گے ۔ کھلاڑیوں کو فتوحات کےلئے عمدہ کارکردگی کے تسلسل کو برقرار رکھنا ہو گا۔ اگر اگلے میچوں میں غلطیاں کیں تو سری لنکا سیریز میں کم بیک کر سکتا ہے۔ سری لنکا کرکٹ ٹیم کے کپتان مہیلا جے وردھنے نے کہا کہ پاکستان کا باﺅلنگ اٹیک بہت مضبوط ہے ۔عمر گل، محمد سمیع اور سہیل تنویر کی وجہ سے پاکستانی ٹیم کا باﺅلنگ اٹیک مضبوط ہے۔ تینوں باﺅلرز کا سامنا کرنے کےلئے بلے بازوں کو حکمت عملی اپنانا ہو گی، پاکستان خطرناک ٹیم ہے دوسرے میچ میں فتح کےلئے کھلاڑیوں کو کھیل کے تینوں شعبوں پر سخت محنت کرنا ہو گی۔